Kandidati për president i SHBA, Donald Trump u qëllua me disa plumba gjatë një mitingu me mbështetësit e tij në Pensilvani. Të shtënat me armë u dëgjuan ndërsa Trump ishte duke folur. Në fillim ai shihet që heziton një moment, pastaj ulet sepse dëgjon thirrjet e truprojave. Ish-presidenti u nxorr jashtë skenës nga stafi i sigurisë.
Trump duket që rrëzohet në tokë teksa po mbante fjalimin. Ai u rrethua shpejt nga sigurimi i armatosur dhe qëndroi poshtë për rreth një minutë.
Më pas u ngrit në këmbë dhe ngriti grushtin në ajër, duke përsëritur “Fight! Fight! Fight!” (Luftoni! Luftoni! Luftoni!) përpara se të përcillej nga skena dhe në një automjet. Më pas ai është larguar nga vendi i ngjarjes.
Videoja dukej se tregonte gjak në veshin e tij ndërsa e merrnin. Ish-presidenti dukej se po shtrëngonte anën e kokës teksa ra në tokë.
Senatori republikan për Ohio, J.D Vance, tha në një postim në platformën e mediave sociale X: “Të gjithë bashkohuni me mua në lutjen për Presidentin tonë Trump dhe të gjithë në atë tubim. Shpresoj që të gjithë të jenë mirë.”
Pas incidenti, shefi i komunikimit i Shërbimit Sekret të SHBA-së, Anthony Guglielmi ka bërë me dije se ish-presidenti Donald Trump është i sigurt.
“Një incident ndodhi mbrëmjen e 13 korrikut në një tubim të Trumpit në Pensilvani. Shërbimi Sekret ka zbatuar masat mbrojtëse dhe ish-presidenti është i sigurt. Ky është tani një hetim aktiv i Shërbimit Sekret dhe informacione të mëtejshme do të publikohen kur të jenë të disponueshme, “tha Guglielmi në një deklaratë.
Ndërkohë mediat amerikane raportojnë për dy të vdekur në vendin e ngjarjes, njëri prej tyre mendohet të jetë atentatori.
