Nënshkrimi i ri i Evertonit, Armando Broja është shprehur se dëshiron të ndërtojë një marrëdhënie të shkëlqyer me tifozët në intervistën e tij të parë pasi u prezantua si lojtar i Bluve.
Huazimi i sulmuesit kuqezi nga Chelsea u konfirmua vonë në ditën e fundit të transferimit me një opsion për ta bërë këtë lëvizje të përhershme.
“Si lojtar, veçanërisht si lojtar i ri, je i prirur të ndihesh i kërkuar nga njerëzit dhe kjo është mënyra se si Evertoni më ka bërë të ndihem që nga dita e parë”, tha Broja për mediat e Evertonit.
“Ata më kanë dashur vërtet dhe më kanë thënë pse, kështu që kjo të bën të ndihesh vërtet i lumtur dhe krenar”.
“Ndoshta fillimi i sezonit nuk ka shkuar ashtu siç dëshironim, por ne patjetër mund ta kthejmë atë me skuadrën dhe menaxherin që kemi këtu. Sigurisht që ndihem sikur do të ketë shumë ditë pozitive përpara. Unë jam duke u fokusuar vetëm në rikthimin dhe integrimin me ekipin”.
“Dua të lë përshtypje edhe te tifozët, duke shënuar gola, duke krijuar raste, me ritmin e punës time, duke qenë agresiv si sulmues dhe duke ndihmuar skuadrën në çdo mënyrë që mundem”.
“Dua të hyj dhe të ndërtoj një marrëdhënie të shkëlqyer me tifozët, me shokët e skuadrës dhe me stafin. Kur ndihesh si në shtëpi dhe ndihesh i lumtur, atëherë luan futbollin tënd më të mirë”.
Broja pritet të mungojë deri në mes të tetorit për shkak të një dëmtimi në këmbë, por është pozitiv për rehabilitimin e tij.
“Po shkon mirë,” shtoi ai. “Shpresoj se mund të kthehem sa më shpejt që të jetë e mundur. Mendoj se po shkoj në drejtimin e duhur”.
“Dua të sigurohem që të shërohem mirë dhe të jem aq i fortë sa të mundem, kështu që jam gati për tifozët dhe shokët e mi të skuadrës. Thjesht mezi pres të kthehem, të vesh fanellën dhe thjesht ta shijoj atë”.
