Një ngjarje tronditëse mësohet të ketë ndodhur në zonën e Kombinatit në Tiranë, ku një telefonatë alarmante ka ngritur në këmbë policinë e Shtetit.
Sipas raportimeve në media, një vajzë është rrëmbyer me forcë dhe është futur në një makinë. Incidenti dyshohet të ketë ndodhur mbrëmjen e sotme në zonën e njohur si “Rruga e Qelqit”. Telefonuesi ka dhënë disa detaje lidhur me makinën ku besohet se mbahet vajza, megjithëse identiteti dhe mosha e saj ende nuk janë bërë të ditura.
Policia e Komisariatit nr. 6 ka nisur menjëherë kërkimet në zonë për një automjet tip “Benz”. Gjatë kontrollit, brenda makinës janë verifikuar edhe dy vajza të tjera, identiteti i të cilave ende nuk bëhet i ditur.
Pas një hetimi të detajuar, Policia ka zbardhur ngjarjen dhe ka konfirmuar se kemi të bëjmë me një mosmarrëveshje mes një çifti dhe jo me një rast të vërtetë rrëmbimi.
Në fakt, incidenti përfshinte një përleshje mes një çifti, dhe nuk kishte të bënte me ndonjë akt të paligjshëm.
Policia ka shoqëruar të dy personat, djalin dhe vajzën, për t’i marrë në pyetje dhe për të sqaruar situatën në komisariat. Nga ana e vajzës nuk ka pasur ndonjë kallëzim për rrëmbim ose akuzë të tillë, duke e hedhur poshtë hipotezën e një rrëmbimi.