Puna për ndërtimin e terminalit të ri Jug & Veri te Kthesa e Kamzës ka filluar, duke shënuar një hap të rëndësishëm për përmirësimin e infrastrukturës së transportit publik në kryeqytet. Terminali i ri do të shërbejë si një pikë qendrore për të gjitha linjat e autobusëve që vijnë nga veriu dhe jugu i vendit, ndërkohë që linjat nga juglindja do të vazhdojnë të përdorin Terminalin Lindor te TEG.
Terminali do të vendoset në zonën e kthesës së Kamzës, duke shërbyer si terminali përfundimtar, në të njëjtin vend ku është aktualisht terminali provizor.
Terminali i ri do të ketë 63 vend-poste dhe stacione për autobusët që vijnë nga veriu dhe jugu të vendit.
Shërbimi: 43 linja për zonën e jugut dhe 20 linja për zonën e veriut do të kenë shërbimin e tyre në terminalin e ri.
Transporti Urban: Katër linja të autobusëve urban (linja e ‘City Park’, e Kamzës, Institutit dhe ‘Tirana e Re’) do të ndalojnë pranë terminalit të autobusëve për të lehtësuar lëvizjen e qytetarëve.
Terminali i autobusëve do të harmonizohet me terminalin e trenit për Rinas dhe Durrës, duke ofruar një qendër transporti multimodal.
