Gazetari i njohur grek, Stavros Theodorakis, autori i programit “Protagonistes” në Alpha TV, ka qenë së fundi në Shqipëri për të realizuar një emision për ata që ai i quan “grekët e rivierës shqiptare”. Udhëtimi i tij ndalet fillimisht në Ksamil aty ku takon një të ri që është kthyer pas shumë vitesh në Greqi dhe tani punon në sektorin e turizmit në vendin tonë. Më pas udhëtimi vijon në Sarandë, ku bisedon me disa që kanë qenë në Greqi më parë e tani kanë bizneset e tyre në Shqipëri. Përshtypje i bën natyrisht zhvillimi i sektorit të turizmit në vendin tonë.
Gazetari takon gjithashtu edhe turistë të ardhur nga Janina për të vizituar Sarandën. Më pas rrugëtimi i tij vijon në Portopalermo e në Himarë. Sërish aty ka disa biseda me njerëz të rikthyer nga Greqia që tashmë kanë bizneset e tyre në Himarë. Ndalesë tjetër e gazetarit është edhe shkolla greke “Omiros” në Himarë. Sipas tij ka edhe shumë fëmijë shqiptarë që zgjedhin të ndjekin mësimet në këtë shkollë.
Udhëtimi vijon më pas në Dhimadhes dhe Palasë, ku mes atyre që flasin është edhe gazetari i Top Channel, Ilir Paço. “Nuk kam kundërshti me zhvillimin e turizmit, por me mënyrën e zhvillimit. Shtëpitë tona janë të voglat, të mëdhatë janë të të huajve”, thotë mes të tjerash gazetari Paço.
Ndalesa e fundit e gazetarit është Vlora, aty ku bisedon me një vajzë nga Narta, fshat ku jetojnë pjesëtarë të minoritetit grek. Në tërësi emisioni fokusohet në zhvillimin e turizmit në rivierën shqiptare dhe përpjekjen e vështirë sipas gazetarit të komunitetit grek për të ruajtur identitetin e tyre. Në videon më poshtë shihni të plotë emisioni. ©Argjiroja.net
