Policia Rrugore e Gjirokastrës ka intensifikuar monitorimin në të gjitha akset rrugore të qarkut, me kontrolle 24 orë në 7 ditë dhe përdorimin e pajisjeve bashkëkohore, me fokus kryesor garantimin e sigurisë së përdoruesve të rrugës.
Në vëmendje të veçantë janë edhe institucionet arsimore, ku është shtuar prania e shërbimeve të Policisë Rrugore gjatë hyrjes dhe daljes së nxënësve, për të garantuar sigurinë e tyre dhe për të menaxhuar lëvizjen e automjeteve në këto zona.
Gjatë dy javëve të fundit, si rezultat i monitorimit dhe kontrolleve të vazhdueshme, janë arrestuar apo proceduar penalisht 7 shtetas, ndërsa janë pezulluar 38 leje drejtimi.
Në të njëjtën periudhë, Policia Rrugore ka vendosur 2,268 masa administrative për shkelje të ndryshme të rregullave të qarkullimit. Ndër shkeljet kryesore të konstatuara janë:
816 masa për tejkalim të shpejtësisë së lejuar;
608 masa për parakalime të gabuara;
562 masa për ndalim apo qëndrim të gabuar të automjeteve;
23 masa për mosvendosjen e kaskës mbrojtëse;
7 masa për mosvendosjen e rripit të sigurimit;
7 masa për përdorimin e celularit gjatë drejtimit të mjetit;
4 masa për drejtim të mjetit nën efektin e alkoolit;
241 masa për shkelje të tjera të Kodit Rrugor.
Një tjetër fokus i kontrolleve është transporti publik dhe transporti i nxënësve. Kontrollet e përditshme synojnë verifikimin e dokumentacionit dhe respektimin e kushteve të sigurisë, për të parandaluar çdo situatë që mund të cenojë pasagjerët.
Në këtë kuadër, gjatë dy javëve janë vendosur edhe 50 masa administrative, për shkelje që lidhen me transportin publik pa dokumentacionin përkatës, transportimin e nxënësve mbi kapacitetin e lejuar, si dhe mosrespektimin e përparësisë së këmbësorëve, veçanërisht pranë institucioneve arsimore.
Policia Rrugore e Gjirokastrës njofton se kontrollet dhe monitorimet do të vijojnë në mënyrë të vazhdueshme në akset urbane, interurbane dhe rurale, me qëllim rritjen e sigurisë dhe parandalimin e aksidenteve rrugore.
Në të njëjtën kohë, Policia u bën apel të gjithë përdoruesve të rrugës që të tregojnë kujdes maksimal, të respektojnë rregullat e qarkullimit dhe të kontribuojnë në krijimin e një mjedisi më të sigurt për drejtuesit, pasagjerët dhe këmbësorët.
Për çdo shkelje të rregullave të qarkullimit rrugor, qytetarët mund të denoncojnë në numrin pa pagesë 112.
