Sot, në ambientet e Komisariatit të Policisë Tepelenë, u zhvillua festa e 112-vjetorit të Policisë së Shtetit Shqiptar. Kjo ngjarje e veçantë mblodhi së bashku drejtues të policisë, veteranë, përfaqësues të pushtetit vendor dhe qytetarë, duke përkujtuar historinë dhe kontributin e kësaj force në shërbim të sigurisë publike.
Ceremonia nisi me intonimin e Himnit Kombëtar. Fjalën përshëndetëse e mbajti drejtuesi i Komisariatit të Policisë Tepelenë, Kryekomisar Ilirjan Demaj, i cili shprehu mirënjohjen për punën e palodhur të efektivëve të policisë ndër vite. Në fjalën e tij, zoti Demaj vuri theksin tek rëndësia e përkushtimit dhe bashkëpunimit në rritjen e sigurisë publike. Ai tha se angazhimi në vijim do të fokusohet në parandalimin dhe goditjen e paligjshmërisë në të gjitha format që ajo shfaqet, me fokus kryesor goditjen ndaj grupeve kriminale, luftë pa kompromis ndaj krimit të organizuar, trafiqeve të paligjshme, bashkëpunimit me qytetarët për të parandaluar dhunën në familje, parandalimin e kultivimit të bimëve narkotike dhe krimeve mjedisore në tërësi.
Në vazhdim, përshëndeti Kryetari i Bashkisë Tepelenë, Tërmet Peçi, i cili vlerësoi rolin e Policisë së Shtetit si një shtyllë e rëndësishme e rendit dhe sigurisë në komunitet. Ai premtoi mbështetjen e pandërprerë të pushtetit vendor për institucionin e policisë.
Festa e Policisë në Komisariatin Tepelenës u mbyll me falënderime të shumta për të gjithë ata që kanë kontribuar në forcimin e rendit dhe sigurisë në qytetin e Tepelenë dhe më gjerë.
