Një 76-vjeçar është arrestuar nga Policia e Memaliajt, pasi u kap në flagrancë pranë disa vatrave zjarri që dyshohet se i kishte ndezur në fshatin Vasjar.
Në pranga është vënë shtetasi Q. Sh., 76 vjeç, banues në Vasjar, i cili, sipas Policisë, dyshohet se kishte ndezur zjarret në një sipërfaqe toke që e kishte marrë me qira, si dhe në tokë në pronësi të shtetit, në vendin e quajtur “Gropa e Dardhës”.
Nga hetimet paraprake dyshohet se zjarret janë ndezur me qëllim pastrimin e sipërfaqeve të tokës. Si pasojë e përhapjes së flakëve, janë djegur rreth 4000 metra katrorë tokë, ku përfshihen pyje, kullota dhe sipërfaqe me bimësi të ndryshme.
Ndërhyrja e menjëhershme e shërbimeve të Stacionit të Policisë Memaliaj ka bërë të mundur kapjen në flagrancë të 76-vjeçarit pranë vatrave të zjarrit.
Sipas Policisë, i arrestuari është ndaluar edhe më parë për të njëjtin krim, ndërsa materialet procedurale i janë referuar Prokurorisë për vijimin e hetimeve dhe veprimeve të mëtejshme.
Policia e Gjirokastrës ka përsëritur apelin për qytetarët që të mos përdorin zjarrin për djegien e mbetjeve apo pastrimin e tokave, duke paralajmëruar se zjarret mund të përhapen në mënyrë të pakontrolluar dhe të shkaktojnë pasoja të rënda për jetën, shëndetin dhe pronën, por edhe përgjegjësi penale.
