Riaktivizohet projekti i i Ujësjellësit të Himarës në lumin Shushica

Nga Nensi Bogdani

Teksa procesi gjyqësor për kundërshtimin e projektit të ujësjellësit të Himarës po vijon ende, në terren autoritetet kanë riaktivizuar punimet duke filluar me zhvendosjen e tubave të devijimit në territorin e Parkut Kombëtar të Lumit të Egër Vjosa.

“Është e papranueshme që pavarësisht kundërshtimit të fuqishëm nga ana jonë si banorë të luginës së

Shushicës, ky projekt të vijojë punimet brenda parkut kombëtar të Vjosës”, tha Astrit Balilaj, kryeplaku i fshatit Kuç.

Projekti i ujësjellësit të Himarës parashikon devijimin e ujit nga burimi i lumit të Shushicës për ta kanalizuar atë nëpërmjet një tubacioni 17 km drejt bregdetit të Himarës në mënyrë që të përmbushë kërkesat e turizmit masiv.

Sipas ekspertëve mjedisorë nga EcoAlbania që kanë ngritur zërin për kundërshtimin e këtij projekti, diga e devijimit – infrastruktura më e rëndësishme dhe më shkatërruese e projektit të devijimit ë ujit – është akoma për t’u ndërtuar.

Tubat që planifikohen të përdoren për të marrë ujin e Shushicës, ishin të stacionuar pranë vendgrumbullimit të tyre në urën e Laskos në Kuç prej më shumë se 1 vit e gjysmë, pasi hasën në kundërshtinë e banorëve.

“Së fundmi zbatuesit e projektit kanë nisur të shpërndajnë tubat në anë të rrugës nacionale, përgjatë rrjedhës së sipërme të Shushicës, për tu përgatitur për vijimin e punimeve”, shkruhet në deklaratën për shtyp të organizatës mjedisore EcoAlbania.

“Beteja për mbrojtjen e ujit të Shushicës vijon, tashmë edhe në gjykatë. Ne jemi të vendosur ta ndjekim këtë rast ne të gjitha instancat për të moslejuar këtë ndërhyrje shkatërruese në Parkun Kombëtar të

Lumit të Egër Vjosa”, tha Olsi Nika nga EcoAlbania. Nga ana tjetër, banorët e zonës I bëjnë thirrje qeverisë të ndalojë përfundimisht këtë projekt.

“I bëjmë thirrje qeverisë të heqë dorë nga marrja e ujit të Shushicës për ujësjellësin e Himarës dhe të përdorë alternativa të tjera për realizimin e tij”, u shpreh kryeplaku I fshatit Kuc, Astrit Balilaj.

Qeveria vijon të mos ketë ende një deklaratë publike në lidhje me vijimin e punimeve./BIRN