Pasardhësi i kryepeshkopit Anastas Janullatos në krye të Kishës Ortodokse Autoqefale të Shqipërisë do të jetë një shqiptar. Këtë e ka deklaruar edhe vetë kryepeshkopi gjatë një interviste për televizionin grek Skai disa vite më parë. Teksa gazetari e pyet për pasardhësin e tij nëse do të jetë shqiptar, Janullatos i jep këtë përgjigje:
“Po kjo është e qartë. Unë kam mësuar të respektoj tjetrin dhe të drejtën e tij. Cilat janë të drejtat e tyre. Do ta imagjinonit dot sikur ne (grekët) të kishim një situatë të ngjashme dhe të pranonim për shumë vite një kryepeshkop nga Bullgaria apo Serbia? Unë e konsideroj si të vetëkuptueshme diçka të tillë. Nuk shkuam aty (në Shqipëri) të ndërtojmë një koloni, por një Kishë Ortodokse Autoqefale të Shqipërisë. Mes 14 kishave ortodokse autoqefale, është edhe Shqipëria, pastaj vjen Çekia dhe Sllovakia. Kjo kishë ka edhe një rol brenda këshillit ortodoks”, deklaroi kryepeshkopi Anastas Janullatos.
40 ditë pas vdekjes së tij sipas statutit, do të mblidhet Sinodi i Shenjtë i Kishës, i përbërë nga 7 anëtarë të cilët do të zgjedhin kryepeshkopin e ri. Dy prej anëtarëve, janë me shtetësi greke, ndërsa 5 të tjerët janë shqiptarë. Deri më tani emri më i përfolur si pasues i Janullatos është ai i mitropolitit të Korçës, Joan Pelushi. Megjithatë mbetet për t’u parë në vijim se ç’do të ndodhë. ©Argjiroja.net
