Dy të dyshuarit për atentatin e 15 dhjetorit në Thrakomakedones të Athinës, ku mbeti i vrarë 47-vjeçari Irakli Davella dhe u plagosën 46-vjeçari Edi Lulo alias Etmond Hysa, si dhe një shtetas tjetër shqiptar, dolën sot para Gjykatës në Greqi.
Jenis Tulja, 44 vjeç, dhe Mirjan Guveli, 45 vjeç, mohuan përfshirjen e tyre në ngjarjen e rëndë. Ata refuzuan të jepnin deklarime para trupit gjykues, duke kërkuar fillimisht të njiheshin me provat, veçanërisht ato audio-vizive, të cilat, sipas avokatëve mbrojtës, ende nuk u janë vënë në dispozicion.
Në një deklaratë me shkrim, avokatët e të pandehurve, Manolis Anastasakis dhe Spyridon Dionysiotis, u shprehën:
“Klientët tanë mohuan akuzat dhe më pas ushtruan të drejtën e tyre për të heshtur, sepse nuk na është vënë në dispozicion materiali shkresor i hetimeve paraprake, veçanërisht materiali audio-vizual, i cili konsiderohet si prova kryesore. Ne rezervojmë të drejtën për një seancë shtesë kur dhe nëse do të na bëhen të ditura këto detaje.”
