Janari i këtij viti ishte më i ngrohti në histori. Temperatura mesatare e sipërfaqes së Tokës u llogarit në 13.23 gradë ose 0.79 gradë mbi mesataren e këtij muaji për periudhën 1991 – 2020. Lajmin e dha shërbimit të motit të BE-së, Copernicus.
Janari i vitit 2025 ishte 1.75 gradë mbi nivelet para-industriale. Ky ishte muaji i 18-ti në 19 muajt e fundit në të cilin temperatura mesatare globale e sipërfaqes ishte 1,5 gradë mbi nivelet para-industriale.
Temperaturat evropiane ishin kryesisht mbi mesataren e viteve 1991-2020 në Evropën Jugore dhe Lindore, duke përfshirë edhe Rusinë Perëndimore. Në të kundërt, ato ishin nën mesatare në Islandë, Mbretërinë e Bashkuar dhe Irlandë, Francën veriore.
Jashtë Evropës, temperaturat ishin kryesisht mbi mesataren në verilindje dhe veriperëndim të Kanadasë, Alaskës dhe Siberisë. Mbi mesataren gjithashtu në Amerikën Jugore, Afrikë dhe pjesën më të madhe të Australisë dhe Antarktidës.
Megjithatë, ato ishin më të ulëta veçanërisht në Shtetet e Bashkuara dhe në rajonet më lindore të Rusisë. Gadishulli Arabik dhe Azia Juglindore kontinentale gjithashtu shënuan temperatura nën mesatare.
Shërbimi evropian i klimës Copernicus tha se bota u ngroh në një tjetër rekord mujor të nxehtësisë në janar, pavarësisht se Shtetet e Bashkuara u goditën nga moti anormalisht i ftohtë.
“Janari 2025 është një tjetër muaj befasues, duke vazhduar temperaturat rekord të vërejtura gjatë dy viteve të fundit, pavarësisht nga zhvillimi i kushteve të La Niña në Paqësorin tropikal dhe efekti i tyre i përkohshëm ftohës në temperaturat globale,” – tha Samantha Burgess, Drejtuese Strategjike për Klimën në ECMW.
