Me një rritje prej 80% të mbërritjeve ndërkombëtare të turistëve, Shqipëria ka tejkaluar gjigantët botërorë të turizmit si Arabinë Saudite që pati një rritje prej 69%, Egjiptin me 23%, Japoninë me vetëm 16% rritje, Turqia 14%, Spanja 13%, Brazili 5% dhe Francën me 1% rritje të turizmit.
Por, si arriti Shqipëria të tejkalonte disa nga destinacionet më të njohura të udhëtimit në botë?
Sipas Travel and Tour World, plazhet dhe peizazhet e pacenuara, çmimet e përballueshme dhe qytetet e mbrojtura nga UNESCO ishin vetëm disa nga arsyet. Ndërsa destinacionet tradicionale u përballën me rritjen e kostove të udhëtimit dhe ngopjes së tregut, Shqipëria u shfaq si një destinacion i freskët dhe i pashfrytëzuar mesdhetar që ofron peizazhe mahnitëse, histori të pasur dhe përvoja autentike, pa turma apo çmime të larta.
Destinacione si Ksamili, Saranda dhe Riviera Shqiptare po tërheqin ata që kërkojnë hapësira me diell dhe ujëra të kristaltë, pa çmimet e larta të ishujve grekë. Ndërkohë, rrugët me kalldrëm të Gjirokastrës dhe Beratit, të dyja vende të Trashëgimisë Botërore të UNESCO-s, u japin udhëtarëve një shije të historisë dhe kulturës së pasur të Shqipërisë.
Një tjetër faktor kyç që nxit rritjen e Shqipërisë është lehtësia e aksesit dhe politikat e udhëtimit pa viza për shumë kombësi. Me rrjete të përmirësuara rrugore dhe lidhje të reja fluturimi nga qytetet kryesore evropiane, Shqipëria nuk ka qenë kurrë më e aksesueshme. Linjat ajrore që ofrojnë bileta të ulëta dhe një numër në rritje i anijeve turistike që ankorohen në Durrës, kanë kontribuar gjithashtu në fluksin e turistëve që kërkojnë një arratisje të freskët dhe të përballueshme nga Mesdheu.
Përtej plazheve dhe historisë së saj, Shqipëria ofron diçka për çdo lloj udhëtari. Kërkuesit e aventurës po vërshojnë në Bjeshkët e Nëmuna për disa nga shtigjet më të mira të ecjes në Evropë, ndërsa adhuruesit e ushqimit kënaqen me kuzhinën shqiptare të frymëzuar nga Mesdheu që ndërthur ndikimet nga Italia, Greqia dhe Perandoria Osmane. Atmosfera mikpritëse e vendit, jeta e gjallë e natës në Tiranë dhe sektori i turizmit luksoz në zhvillim po kontribuojnë të gjitha në ngritjen e tij shpërthyese në hartën globale të turizmit.
