Ministrja e Shtetit për Rininë dhe Fëmijët, Bora Muzhaqi prezantoi sot para komisionit për Edukimin dhe Mjetet e Informimit Publik të Kuvendit, disa shtesa dhe ndryshime në ligjin “Për rininë”.
Ministrja Muzhaqi theksoi se nevojitet rishikimi i ligjit dhe ky është një proces që ka nisur që në vitin 2022 dhe ka vijuar gjatë gjithë këtyre viteve përmes konsultimeve me të gjitha grupet e interesit.
“Nga të gjitha konsultimet dhe rishikimi i ligjit pikat që kishin nevojë për të ndryshuar dhe përmirësuar më tej janë në gjashtë aspekte: Forcimi i mekanizmave ligjorë që garantojnë pjesëmarrjen e të rinjve në proceset politikëbërësve dhe vendimmarrëse në nivel vendor e qendror; forcimi i mekanizmave që sigurojnë gjithëpërfshirjen e të rinjve shqiptarë; parashikimi i mekanizmave ligjorë për zbatimin e politikave të reja dhe mbështetjen dhe aktivizimin e të rinjve, si dhe forcimi i mekanizmave ligjorë për vendosjen e standardeve dhe rritjen e cilësisë në shërbimet rinore”, tha Muzhaqi.
Po ashtu, sipas ministres nevojitet edhe rregullimi i disa parashikimeve ligjore si dhe harmonizimi me një numër rezolutash të BE-së.
Ndërsa renditi disa ndryshime në unifikimin e procedurave të përzgjedhjes së të rinjve në Këshillat Rinorë, ministrja theksoi se një aspekt shumë i rëndësishëm për të cilin do të ndërhyhet në ligj është edhe bashkëkryesimi me të rinjtë i këtyre këshillave.
“Bashkë me ministrin apo me kryetarët e bashkive, këshillat do të bashkëkryesohen me të rinjtë. Ky është një propozim i ardhur nga vetë ata dhe i pranuar si ndryshim në ligj”, tha Muzhaqi.
Po ashtu, një element tjetër me rëndësi, sipas ministres, është edhe gjithëpërfshirja në këto këshilla e të rinjve me aftësi të veçanta apo të rinjve nga diaspora.
Ky ligj gjithashtu siguron dhe mbështetje reale përmes politikave të reja për mbështetjen dhe aktivizimin e tyre në tre projekte të rëndësishme si Programi Kombëtar i Praktikave të Punës. Ky program do të mbështesë të rinjtë, duke i siguruar një përvoje kualifikuese profesionale në institucionet e administratës shtetërore dhe institucionet e tjera publike, duke garantuar të drejtën e mbikëqyrjes, trajnimit dhe trajtimit ushqimor për të rinjtë gjatë praktikës dhe pas përfundimit të saj, punësimin përmes kontratave të përkohshme të punës të të rinjve me vlerësimin më të lartë.
Programi i Talenteve Rinore mbështet të rinjtë në kultivimin dhe promovimin e talentit të tyre në fushat e artit, kulturës, edukimit, shkencës, teknologjisë dhe sportit, përmes mbulimit të kostove të pjesëmarrjes në kompeticionet dhe në veprimtaritë zyrtare ndërkombëtare, si dhe dhënies së shpërblimit financiar, bazuar në vlerësimin e në rezultatet e arritura nga të rinjtë në këto kompeticione dhe veprimtari ndërkombëtare.
Ndërsa, programi i Nismave Komunitare të zbatuara nga grupimet joformale të të rinjve dhe këshillat vendor rinor, të mbështetura nga fondi grant i dedikuar për rininë me fokus përmirësimin e komunitetit, fshatit apo qytetit në të cilin banojnë. Të rinjtë kanë mundësinë të aplikojnë për mbështetje financiare pranë AKR-së për projekte rinore që ndikojnë drejtpërdrejt në zhvillimin e komunitetit.
Ndryshimet e propozuara sigurojnë vendosjen e standardeve dhe rritjen e cilësisë në shërbimet rinore. Rregullimet e propozuara synojnë të rrisin mundësinë e qendrave rinore për të përfituar nga financimet e donatorëve të huaj dhe aplikimet në projekte ndërkombëtare.
