Ndeshja midis Barcelonës dhe Osasunës, që do të zhvillohej mbrëmjen e sotme dhe është e vlefshme për javën e 27-të të La Ligës, është shtyrë.
Shkak për këtë është bërë ndarja nga jeta e mjekut të ekipit të parë të Barcelonës, Carles Minaro. Ai ka ndërruar jetë në moshën 40-vjeçare, ndërsa klubi nuk ka zbuluar detaje të tjera.
Teksa publiku po zinte vendet në Montjuic dhe lojtarët e Osasuna-s kishin dalë për nxehmje, presidenti katalanas Joan Laporta zbriti në dhomat e zhveshjes dhe informoi lojtarët e ekipit për vdekjen e mjekut të Barçës, Carles Minaaro.
Blaugranët i kërkuan Ligës shtyrjen e ndeshjes pasi tronditja ishte e madhe me organizatorin që dha Ok-in dhe në orën 21:40 tifozët u njoftuan nga altoparlantët se ndeshja nuk do të zhvillohej.
Carles Minaro i ishte bashkuar ekipit mjekësor të Barcelonës që nga viti 2017 dhe deri në verë ishte në krye të skuadrës së futsallit, për t’u promovuar në ekipin e parë të katalanasve këtë sezon.
“Barcelona është thellësisht e pikëlluar që po njofton vdekjen e mjekut të ekipit të parë, Carles Minaro Garcia. Për këtë arsye ndeshja mes Barcelonës dhe Osasunës është shtyrë për një datë të mëvonshme. Bordi i Drejtorëve të Barcelonës dhe i gjithë stafi i dërgojnë ngushëllimet më të thella familjes dhe miqve të tij në këto kohë të vështira”, thuhet në deklaratën e klubit blaugrana.
