Kombëtarja e futbollit ka nisur grumbullimin në Tiranë për përgatitjet e dy ndeshjeve kualifikuese të Kupës së Botës 2026 në Grupin K. Ekipi kuqezi luan në Londër më 21 mars kundër Anglisë dhe tre ditë më vonë në Tiranë mbërrin Andorra.
Sa i takon ndeshjes kundër Anglisë në “Wembley”, statistikat e tanëve lënë për të dëshiruar. Në gjashtë takimet kundër “Tre Luanëve” në gjithë historinë, kuqezinjtë shënojnë gjashtë humbje, të gjitha për kualifikueset e Kupës së Botës ndër vite.
Përtej humbjeve, edhe fati apo më mirë të themi episode të gjykimit kanë qenë kundër Shqipërisë. Në 28 marsin e 2001 në “Qemal Stafa” Anglia na mposhtet 1-3, me fundin e ndeshjes që ishte dramatik dhe një “vjedhje” kundër tanëve që më pas u pranua edhe nga UEFA.
Për kualifikueset e Kupës së Botës 2002, Anglia fitoi 1-3 në Tiranë. “Tre Luanët” kryesonin 0-2 me golat e Michel Owen (73′) dhe Paul Scholes (85′), para se trajneri i ndjerë Medin Zhega të hidhte në fushë Altin Rrakllin.
Ishte pikërisht sulmuesi kavajas që në limitet e ndeshjes shënoi golin e parë për tanët. Me rinisjen e lojës, ekipi shqiptar ia doli të fitonte topin dhe në atë aksion po Rraklli shënoi golin e barazimit, por që u anulua nga anësori luksemburgas.
Protesta nga tanët, por vendimi ishte i pakthyershëm. Në pamjet e përsëritura duket se sulmuesi Rraklli ka qenë në pozicion të rregullt, aq sa UEFA e përdor këtë moment në leksionet sesi nuk duhet të veprojë një anësor. Pas golit të anuluar Anglia shënoi me Andrew Cole për të “vulosur” sfidën 1-3.
Rasti i golit të anuluar për Rrakllin nuk është padrejtësia e vetme që i është bërë kombëtares shqiptare në përballjet kundër “Tre Luanëve”. Në vitin 1989 një gol iu anulua edhe Sulejman Demollarit.
Si të mos mjaftonin këto, në memorien e tifozëve kuqezi janë dy humbjet 5-0 që Anglia na ka shkaktuar në ishull, pikërisht më 26 prillin e 1989 dhe e fundit më 12 nëntor 2021 me golat e Maguire, Kane (3x) dhe Henderson.
