Partizani luajti dje miqësoren me Rabotnickin në Strugë. “Demat” fituan me rezultatin 3 me 0 përballë skuadrës nga Maqedonia e Veriut, që po ashtu do të luajë në turin kualifikues të Ligës së Konferencës.
Trajneri Gega pati mundësinë të aktivizojë 22 lojtarë. Dy formacione në fushë për të parë formën e gjithë grupit. Katër futbollistë ndërkohë nuk ishin nën dispozicionin e Gegës, për shkak dëmtimesh.
Bëhet fjalë për Ismailin, Bytyçin, Janjevën dhe Shala. Koha po kalon dhe bëhet armiku kryesor në këtë periudhë, ndërsa ndeshjet në Europë afrojnë. Partizani do të luajë në turin e parë të Ligës së Konferencës përballë Kaljus. Sfida e parë do të zhvillohet në transfertën e Estonisë, më 10 korrik, ora 18:45. Ndeshja e kthimit do të luhet në “Air Albania”, më 17 korrik, ora 20:00.
