Zjarri në tregun e Durrësit dyshohet se u shkaktua nga një shkëndijë elektrike

Ende del tym nga ajo çfarë ka mbetur nga tregu industrial në zonën e plazhit në Durrës. Mbi 35 vendshitje janë shkrumbuar duke shkaktuar dëme të konsiderueshme material te tregtarët që shisnin në këtë treg.
Fatmirësisht flakët masive që përfshinë tregun gjatë ditës së diel nuk shkaktuan persona të lënduar.
Një ditë më pas, flakët ende nuk ishin dorëzuar plotësisht, ndërsa ekspertët zjarrfikës së bashku me policinë dhe prokurorinë kanë njoftuar nisjen e hetimeve të përbashkëta për të përcaktuar shkaqet e këtij zjarri.
Sipas një njoftimi nga policia e Durrësit, nga verifikimet e deritanishme, dyshohet se zjarri mund të ketë nisur nga tavani i një prej dyqaneve si pasojë e një shkëndije elektrike dhe më pas era e fortë ka favorizuar përhapjen e flakëve thuajse në të gjithë tregun.
Krahas hetimeve pritet të ngrihet një komision edhe për vlerësimin e dëmeve të shkaktuar edhe pse legjislacioni nuk parashikon ndonjë dëmshpërblim në raste të tilla.