Dorëhiqet drejtoresha e Musk/ CEO i platformës X largohet pas dy vitesh në drejtimin e kompanisë

Linda Yaccarino ka dhënë dorëheqjen si CEO e X pas dy vitesh drejtimi të kompanisë së mediave sociale të Elon Musk.
Largimi i saj vjen një ditë pasi asistenti I inteligjences artificiale Grok i kompanisë filloi të shpërndante përmbasjtje antisemite në përgjigjet ndaj përdoruesve. Megjithatë nuk është e qartë nëse dorëheqja e saj ka të bëjë me këtë rast.
Gjithashtu largimi i saj vjen disa muaj pasi Musk e integroi X te xAI, kompania e tij e inteligjencës artificiale. Ky veprim bashkoi zyrtarisht dy entitetet që ishin tashmë të ndërthurura ngushtë, por ngriti pyetje në lidhje me rolin e Yaccarino në kompaninë e re në të ardhmen.
Ajo e njoftoi largimin e saj në një postim në platformë, duke thënë se është jashtëzakonisht mirënjohëse ndaj Musk për besimin që ai tregoi ndaj saj.
Musk iu përgjigj postimit të Yaccarino me një koment të shkurtër: “Faleminderit për kontributet e tua.”
Yaccarino e mori detyrën në qershor të vitit 2023, rreth tetë muaj pasi miliarderi bleu platformën e mediave sociale.
Por detyra e saj është shënuar nga kriza të përsëritura të marrëdhënieve me publikun, duke përfshirë shqyrtimin mbi përmbajtjen antisemite dhe përmbajtje të tjera me gjuhë urrejtjeje që përhapet në platformë, pretendime të rreme virale rreth konflikteve ndërkombëtare dhe reklama që shfaqen së bashku me përmbajtje pro-naziste në faqe.
Kjo bëri që disa marka të tërhiqnin reklamat e tyre, duke shënuar humbje të ndjeshme për platformën.