Kryeministri shqiptar Edi Rama e ka çuar një hap më tej idenë e tij për përfshirjen e inteligjencës artificiale (AI) në qeverisje.
Kreu i Qeverisë njoftoi këtë të enjte se do të krijohet një ministër i Shtetit për Inteligjencën Artificiale, ndërsa propozoi edhe mundësinë e një kabineti qeveritar me pjesëmarrjen e AI-t.
Gjatë një takimi në Berat me zhvillues dhe përfaqësues të sektorit të teknologjisë, Rama i ftoi ata të hartojnë një draft të programit “AI Albania 2030”, që do të pasqyrojë vizionin për rolin e Shqipërisë në fushën e inteligjencës artificiale deri në vitin 2030.
Ai theksoi se programi do të diskutohet dhe miratohet për t’u paraqitur në Parlament si pjesë e agjendës qeveritare.
“Nëse do arrini të krijoni një model të Inteligjencës Artificiale që të zgjedhë ministrin, do të jetë hapi i parë drejt momentit historik kur Shqipëria do të jetë e para që ka qeveri të tërën me ministra dhe kryeministër me Inteligjencë Artificiale”, theksoi kryeministri.
“Pastaj do kalojmë në një nivel tjetër – do punojë AI dhe ne të tjerët do bëjmë muhabet për politikën, pa pasur mundësi të marrim ndonjë vendim”, përmbylli kryeqeveritari.
Vetëm se vështirë se mund ta ketë pasur seriozisht.
Deri tek një ministër po, por kryeministër dhe Qeveri me Inteligjencë Artificiale…
