I aksidentuari mbrëmjen e djeshme, në aksin Gjirokastër-Kakavijë, i cili u përplas nga një automjet që drejtohej nga një 29-vjeçar, ndodhet në gjendje të rëndë shëndetësore në Spitalin e Traumës në Tiranë.
Ngjarja ndodhi mbrëmjen e së shtunës në aksin rrugor Gjirokastër–Kakavijë, ku një këmbësor rreth 60 vjeç u përplas rreth orës 22:30, në vendin e quajtur “Kryqëzimi i Glinës”, nga një automjet tip Volkswagen, i drejtuar nga shtetasi T. B., 29 vjeç.
Viktima u dërgua në spitalin e Gjirokastrës fillimisht dhe pastaj në Spitalin e Traumës në Tiranë.
Drejtuesi i mjetit është arrestuar ndërkohë nga Policia e Shtetit.
NJOFTIMI I POLICISE
Në vijim të informacionit paraprak të dhënë mbrëmjen e djeshme, për aksidentin e ndodhur në aksin rrugor “Gjirokastër-Kakavije”, ju informojmë se specialistët e Sektorit të Policisë Rrugore, në përfundim të veprimeve procedurale, bënë arrestimin në flagrancë të shtetasit T. B., 29 vjeç, banues në Gjirokastër, sepse automjeti që drejtonte ka aksidentuar, këmbësorin, shtetasin S. A., 56 vjeç, banues në fshatin Lazarat, i cili ndodhet në spitalin e Traumës, në kujdesin e mjekëve.
