Ministria e Mbrojtjes njofton se në 24 orët e fundit janë regjistruar 38 vatra zjarri në të gjithë vendin, prej të cilave 7 janë ende aktive.
Situata më e rënduar paraqitet në Finiq, ku 51 familje nga fshatrat Velahovë dhe Livinë janë evakuuar për shkak të rrezikut nga flakët.
Në vatrën mbi fshatin Bistricë po punojnë mjete zjarrfikëse të MZSH dhe efektivë të Forcave të Armatosura, ndërsa me intensitet vijon puna edhe në zonat mbi fshatrat Dhrovjan dhe Krongj. Për shkak të terrenit të thyer dhe shtrirjes së madhe të flakëve, në operacion janë angazhuar edhe një helikopter i FA dhe një avion kroat Kanadair.
Aktive vijojnë të jenë edhe vatrat pranë Tunelit të Skërficës, te Maja e Lucës, në Bolenë të Himarës, në Malaj të Epërm në Rrëshen dhe në Malin e Allushit në Klos.
Në bashkinë Poliçan, jashtë territorit të Uzinës Mekanike, një zjarr në sipërfaqe me shkurre dhe ullishte është vënë nën kontroll që prej mbrëmjes së djeshme. Ditën e sotme në terren kanë punuar 15 efektivë zjarrfikës të MZSH Poliçan.
Ndërkohë, një vatër e re është regjistruar në fshatin Zagore, njësia administrative Shkrel, bashkia Malësi e Madhe, ku po punohet për shuarjen e flakëve në një zonë me shkurre dhe barishte.
