Autoritetet greke kanë arrestuar një 27-vjeçar, i dyshuar si autori i ekzekutimit të shqiptarit Artur Bashimi, ngjarje e ndodhur më 18 gusht 2025 në lagjen Agios Panteleimonas të Athinës.
Sipas mediave greke, i riu ka pranuar autorësinë përpara hetuesve, duke treguar se për eliminimin e 47-vjeçarit shqiptar ishte paguar 15 mijë euro. Ai deklaroi se nuk njeh porositësin e vrasjes dhe se urdhri kishte ardhur nga brenda burgjeve të Greqisë.
Hetimet zbulojnë se i arrestuari nuk është i panjohur për policinë, pasi njihet si përdorues i rregullt i lëndëve narkotike.
Si ndodhi atentati
Ngjarja ndodhi pasditen e 18 gushtit, në kryqëzimin e rrugëve Michael Voda dhe Rodou në Athinë. Pamjet e kamerave të sigurisë kanë filmuar gjithë skenën e krimit.
Autori, i veshur me të zeza dhe i ardhur me motor, priti Bashimin dhe e qëlloi me një plumb në gjoks. Ai tentoi të qëllonte për herë të dytë, por arma u bllokua. Pas ekzekutimit, u largua me shpejtësi nga vendi i ngjarjes. Ende mbetet e paqartë nëse viktima ishte nxjerrë në pritë nga dikush tjetër, apo lëvizjet e tij ishin ndjekur më parë nga autori.
