Edi Rama: Kemi standarde të tjera sot në turizëm, krahasimisht me nga jemi nisur. Këtu kam parasysh operatorët turistikë të certifikuar, udhërrëfyesit turistikë të certifikuar që sot janë gati 1000, s’kishim asnjë, strukturat akomoduese etj. Kam parasysh edhe sistemin e administrimit të plazheve, shërbimit shëndetësor, shërbimit policor në një sezon ku kemi pasur 0 ngjarje të rënda kriminale apo ku kemi pasur gati 79 mijë vizita në qendrat e posaçme që hapen për sezonin. Por nuk duhet të na interesojë shumë krahasimi me më parë, sepse kemi probleme dhe sfida që nuk presin për tu adresuar.
Po e nis me plazhet e dhunuara, Ksamili është plazh i dhunuar. Edhe një sërë plazhesh të tjera. Nuk mund të jetë më pre e injorantëve që e shohim si një tokë për t’u pushtuar dhe pastaj për t’u sjellë me turistët si të ishin skllevër që mund të hapin dhe shkopin e çadrës në kojkë apo të venë çmime që lëndojnë imazhin e turizmit shqiptar. Në tërësi, duhet të shërojmë plazhet e dhunuara, t’ua heqim nga dora privatëve. Nuk ka më arsye që Ksamili të jetë plazh privat. I lidhur me çmime marramendëse. Dhërmiu s’ka pse të ketë më subjekte që vijnë nga vende të tjera që çmendin dynjanë me muzikën dhe derdhin ujërat e zeza në det. Kryebashkiaku i Himarës e ka dhënë një shembull me çadrat e loguara të bashkisë dhe me një shërbim të pastër, pa salltanete, por pa asnjë stres.
Plazhe si i Durrësit, Shëngjinit apo Velipojës janë të mëdha, nuk mund të jenë 100% të administruara nga bashkia, por duhet të vazhdojnë me praktikat më të mira, t’i përgjigjen asaj që qytetari paguan.
Nuk mund të vendosësh çmime marramendëse për një shezlong vetëm se je ne Ksamil, në një parajsë të natyrës kur nuk ke asnjë kontribut për cilësinë e detit, bukurinë e natyrës. Jo të ofrosh shezlong ku rrezikon të të penetrojë gozhda e ndryshkur.
Bashkia e Lezhës ka pasur një rol kyç për pastërtinë, ka dyfishuar forcat e pastrimit përmes operacionit të plazheve të pastra. Plazhi duhet të jetë në dispozicion të yt, jo të uzurpatorëve. Bashkitë duhet ta konsiderojnë seriozisht që në pjesën e lirë për publikun nuk mund të ketë vetëm rërë, por të ketë shërbim, si ai që ka ofruar Himara.
