Arrestimi i një eksportuesi së bashku me dy inspektorë të Autoritetit Kombëtar të Ushqimit (AKU) në Berat, pas bllokimit të një ngarkese me 8 ton domate në Kroaci për shkak të nivelit të lartë të pesticideve, ka shkaktuar frikë dhe pasiguri tek grumbulluesit dhe eksportuesit e tjerë.
Në Roskovec, grumbulluesit shprehen se deri më tani nuk kanë pasur ngarkesa të kthyer apo bllokuar, por rreziku mbetet i lartë.
“Si fillim i bëjmë një thirrje gjithë faktorëve kryesor të cilët janë fermerët që të kenë shumë kujdes në përdorimin e pesticideve ushqyesve së bimës së tyre i bëjmë thirrje gjithashtu edhe agronomëve që tu qëndrojnë afër fermerëve t’i ndihmojnë dhe tu mësojë atyre së çfarë dhe si ti përdorin këto ingriendient. Çdo fermer dëshiron rendiment dhe të fitoj por duhet patjetër që të ruajnë çdo karencë në produktin e frutave dhe perimeve, pasi pasojat i vuajmë ne eksportuesit”, tha Amarildo Agaci, eksportues.
Sipas tij, përgjegjësia për produktin që del në treg bie mbi çdo hallkë të zinxhirit, nga fermeri deri tek eksportuesi. Mungesa e kujdesit, theksoi Agaci, dëmton jo vetëm eksportuesit, por edhe imazhin e bujqësisë shqiptare në tregjet e huaja.
“Duhet patjetër të rregullojmë mënyrën e punës pasi ky është një zinxhir. U bëj thirrjeve institucioneve që të vendosin një rregullator dhe të bëjnë një plan që të ndihmojnë fermerët me agronome të bëjnë kontrollin tek pikat e farmacive bujqësore a janë te licencuara apo jo. Fermeri duhet të mbajë përgjegjësi të plotë për produktin që ai shet”, u shpreh Agaci.
