Pas dorëheqjes së Florenc Spahos, është mësuar emri që do e zëvendësojë në krye të QSUT-së. Bëhet fjalë për Anxhela Paparizon, e cila është prezantuar sot si drejtoresha më e re e Qendrës Spitalore Universitare “Nënë Tereza”.
Paparizo, së cilës i është besuar drejtimi i QSUT-së nuk ka asnjë lidhje me mjekësinë. Ajo ka qenë Drejtoreshë e Kultures dhe Arsimit dhe më pas Drejtoreshë e Kulturës, Rinisë dhe Sporteve në Bashkinë e Tiranës, në kohën kur kjo e fundit drejtohej nga Edi Rama.
Pasi emigroi në Kanada, Paparizo vazhdoi studimet në Universitetin e British Columbia për Planifikim Kulturor dhe ne Ivey School of Business për Lidership Ekzekutiv Bashkiak.
Njëkohësisht ajo udhëheq departamentin e Arteve dhe Kulturës në Bashkinë e Qytetit të Burlingtonit në Ontario, Kanada, ku emigroi atje në vitin 2008.
Kujtojmë se Florenc Spaho u emërua në krye të QSUT vetëm dy muaj më parë, ndërsa shkaqet e largimit të tij nuk dihen ende.
Spaho kandidoi edhe në zgjedhjet e 11 Majit në qarkun e Elbasanit, por nuk arriti të merrte mandatin e deputetit, pavarësisht se PS fitoi 10 deputetë në atë qark.
