Një stuhi reagimesh e komentesh të ndryshme kanë vërshuar në rrjetet sociale teksa pranë Këshilli të Qarkut Gjirokastër në rrugën me kalldrëm po vendosen disa bllokuese prej guri, në mënyrë që automjetet të mos parkohen aty pranë.
Zona pritet të shndërrohet ne pedonale pas një projekti të financuar nga Banka Botërore e të zbatuar nga Fondi Shqiptar i Zhvillimit. Qytetarët në rrjet kundërshtojnë hedhjen e betonit për fiksimin e bllokuesve, por edhe faktin që këto bllokues nuk janë prej hekuri.
Investimi vjen pas një studimi në kuadër të këtij projekti të Fondit Shqiptar të Zhvillimit për mobilitetin e njerëzve dhe automjeteve drejt qendrës historike. Pistonat janë vendosur në zonat ku nuk është e mundur të krijohen trotuare teksa rruga do të bëhet vetëm me një sens kalimi.
Megjithatë deri më tani nuk ka një reagim për investimin as nga Bashkia Gjirokastër dhe as nga Fondi Shqiptar i Zhvillimit që po realizon projektin.
Kujtojmë që debate të tilla pati edhe vite më parë kur Pazari u shndërrua në zonë pedonale.
Por më pas rezultoi se në fakt ishte një vendim i drejtë. Mbetet për t’u parë se si do të finalizohet ky investim për zgjatimin e zonës pedonale. ©Argjiroja.net
