Shtator i errët, Partizani rrezikon të djegë sezonin e 80-të

Partizani ka humbur entuziasmin e fillimit të sezonit, që e shoqëronte në prag të 80 vjetorit.

Pas dy javësh kampionat, të kuqtë numëronin 4 pikë të grumbulluara. Fitorja me Vorën dhe barazimi me Teutën u shoqëruan me pushimin për shkak të kombëtareve. Një periudhë që zgjati dy javë dhe që u prit me ngulm te Partizani, për t’i dhënë më shumë hapësirë trajnerit Milinkoviç krah skuadrës. Të kuqtë në shtator kanë qenë ndërkohë më të përgatitur fizikisht, por vetëm me rezultate negative në fushën e lojës.

PËRGATITJET Milinkoviç ka aplikuar dy seanca stërvitore në fillimin e shtatorit, që skuadra të fitojë formën e duhur fizike. Ndryshimi është dalluar në fushë. Partizani i ka përballuar ndeshjet, edhe pse pa shkëlqim. Nëse ndaj Vorës dhe Teutës vihej re një rënie fizike në të paktën 30 minutat e fundit, diçka e tillë nuk ka ndodhur në shtator. Fillimisht ishte sfida me Vllazninë ku rezultati u përmbys nga kuqeblutë në kohën shtesë, më pas humbja ndaj Elbasanit në të cilën Partizani kaloi rreth 40 minuta në fushë me një lojtar më pak. Dhe së fundmi takimi me Bylisin ku të kuqtë ishin shumë larg pritshmërive.

REZULTATET Partizani nuk ka asnjë pikë të grumbulluar në shtator ku janë luajtur tri sfida të vlefshme për kampionatin. Sinjalet negative u dhanë që në miqësoren me Besën, që ndërkohë nuk po gjen fitoren në Kategorinë e Parë. “Demat” e humbën 3 me 2 miqësoren në stadiumin “Niko Dovana” duke treguar për herë të parë vështirësitë që i prisnin. Fitorja e kavajasve erdhi me përmbysje rezultati dhe asgjë nuk duket se ishte rastësi. Përmbysjet janë bërë normale për Partizanin gjatë shtatorit. Si me Vllazninë dhe ndaj Bylisit, të kuqtë nuk ruajtën avantazhin fillestar. Dhe pse kishin mundësinë për të bërë më mirë ndërkohë, u stepën. Fillimisht takimi në Shkodër me kuqeblutë pa Partizanin të shkërmoqej në 5 minuta. Pas penalltisë së dytë të takimit që Vllaznia realizoi, pasuan edhe dy gola të tjerë. Pikërisht ata ishin edhe shembulli, që tregon se si Partizani dorëzohet kur është në disavantazh. Më tej ishte radha e sfidës kundër Elbasanit. Ndaj verdhebluve Partizani ishte dinjitoz fillimisht duke krijuar edhe rastet e tij. Pas golit që verdheblutë shënuan, e më pas kartoni i kuq i Bytyçit, kishte shumë pak për të komentuar në favor të ekipit të Milinkoviç.

RREZIKU Vetëm kohë nuk ka në situatën aktuale. Partizani është në prag të festimeve për 80 vjetorin dhe gjërat nuk po shkojnë sipas planifikimit. Zhgënjimi në Europë ka pasuar deri tani me një zhgënjim edhe në kampionat. Shpresat po pakësohen pasi rivalët për “Final Four” kanë filluar të krijojnë diferencat e tyre. Më konkretisht Elbasani numëron 7 pikë më tepër, ndërsa Vllaznia dhe Egnatia nga 6 pikë kur është akoma faza e parë.

© BalkanWeb