Video e publikuar një ditë më parë në internet ku shfaqej një elektriçist i ri i OSHEE Gjirokastër në përpjekje për të rregulluar rrjetin elektrik të dëmtuar nga përmbytjet, tërhoqi vëmendjen e shumë njerëzve. Mijëra shikime të videos në rrjetet sociale, komente dhe një reagim vlerësues nga vetë ministri i Energjitikës, Damian Gjiknuri. Po kush është ky elektriçist, që mori vëmendjen e të gjithëve në kulmin e kësaj situate emergjente. Libohova Online u interesua më tej dhe kontaktoi me te. Ai quhet Thanas Kuremeno, është banor i fshatit Bularat, Bashkia Dropull. 28-vjeçari pas përfundimit të një shkolle profesionale, punon prej 2 vitesh si elektriçist te OSHEE Gjirokastër. I pyetur për videonqë u bë virale, Thanasi shprehet kështu:
‘Unë nuk e dija fare që kishte video, e kam parë më vonë të postuar te portali ArgjiroLajm.net. Ishim duke punuar për të rregulluar defektet, sepse Lunxhëria ishte pa drita. Unë hipa aty me litar sepse duhet të shkoja deri aty në mes të lumit, për të pastruar linjën. Një shtyllë e kishte marrë lumi dhe unë shkova aty për të kapur telin e linjës”.
I pyetur nëse ishte i frikësuar në ato momente, pasi mund të ndodhte që edhe të binte brenda në lum, Thanasi shprehet se situata të tilla janë diçka e zakonshme për punën e tij.
‘Nuk bëra ndonjë gjë të madhe, thjesht kjo është puna ime. Gati çdo ditë ne jemi mbi shtyllë, përballemi me situata të tilla, këtë punë kemi. E rëndësishme është që të çonim dritat në Lunxhëri sepse kishin disa ditë pa energji dhe ia dolëm. Edhe pse për ju mund të duket e rrezikshme nga jashtë, për mua ishte diçka normale në zanatin që kam zgjedhur”
28-vjeçari shton më tej se e pëlqen zanatin që ka, pavarësisht vështirësive me të cilat përballet, teksa tregohet shumë modest për faktin se prej dy ditësh është vënë në qendër të vëmendjes. Përtej modestisë së Thanasit, akrobacitë e tij mbi lumin Drino, në përpjekje për të rregulluar rrjetin e dëmtuar elektrik, meritojnë një vlerësim të veçantë nga të gjithë. Jo vetëm vlerësim me fjalë të mira e komplimenta pafund. Pse jo edhe një rrogë shpërblim nga kompania për të cilën ai punon prej dy vitesh. ©Libohova Online
