Nga Engjëll Serjani
Pas raportimit një ditë më parë në Parlament, kreu i SPAK-ut, Altin Dumani, ishte sot në Gjirokastër ku mbajti një ligjëratë përpara studentëve, pedagogëve, përfaqësuesve të pushtetit lokal dhe institucioneve vendore.
Takimi u zhvillua në Universitetin “Eqrem Çabej”, në kuadër të çeljes së projektit të BE-së “Education for Better Governance in the Regions of Albania” (EU4EduGovRegAl).
Si folës kryesor, Dumani i orientoi studentët dhe pedagogët drejt rolit të edukimit dhe kërkimit shkencor në forcimin e shtetit të së drejtës dhe përgatitjen e brezit të ri për sfidat e integrimit europian.
Gjatë ligjëratës, ai u ndal edhe te bilanci 6-vjeçar i SPAK-ut dhe rrugëtimi i tij profesional, pasi mandati i tij si drejtues i Prokurorisë së Posaçme përfundon në muajin dhjetor.
“Jam në vitin e 26-të të karrierës sime si prokuror dhe e dua punën që bëj. Pavarësisht posteve që kam mbajtur, që nga oficeri i policisë gjyqësore e deri te drejtues i SPAK, unë gjithmonë e shoh veten si prokuror. Kjo është ajo që jam dhe ajo që dua të jem”, u shpreh Dumani.
Ai e cilësoi drejtimin e SPAK-ut si “sfidën më të madhe” të jetës së tij profesionale – një detyrë që kërkon integritet maksimal, përfshirje të plotë dhe përgjegjësi të jashtëzakonshme.
“Drejtimi i kësaj strukture, në një moment vendimtar për shtetin shqiptar, është një përgjegjësi e madhe, por edhe një privilegj i veçantë për t’i shërbyer vendit në luftën kundër korrupsionit dhe krimit të organizuar”, theksoi ai.
Dumani vlerësoi edhe ekipin e prokurorëve të posaçëm, të cilët i quajti “motorin e SPAK-ut”.
“Kam pasur fatin të punoj me një trupë prej 20 prokurorësh të posaçëm, me integritet dhe profesionalizëm. Ata janë motorri i SPAK-ut,” u shpreh ai.
Në fund të fjalës, kreu i SPAK i ftoi studentët të investojnë te puna dhe përkushtimi personal: “Kur e do atë që bën, çdo sfidë përballohet.”
Projekti i BE-së dhe roli i universitetit
Për përmbajtjen e projektit të financuar nga Komisioni Europian foli koordinatori dhe drejtuesi i tij, pedagogu Dr. Arjan Gjini. Ai sqaroi se projekti përfshin një ekip ndërkombëtar me profesorë nga SHBA, Maqedonia e Veriut dhe universitete shqiptare, si dhe ekspertë të qeverisjes vendore.
Sipas Dr. Gjinit, synimi i programit është edukimi i studentëve mbi çështjet e integrimit europian, forcimi i kapaciteteve të qeverisjes vendore dhe harmonizimi i politikave publike me standardet e BE-së.
Në aktivitet përshëndeti edhe Rektori i Universitetit “Eqrem Çabej”, Prof. Dr. Jaho Cana, ndërsa përfaqësuesi i Delegacionit të BE-së në Shqipëri, z. Miha Pezelj, vlerësoi përfshirjen e institucioneve vendore të Gjirokastrës në projektet e financuara nga Bashkimi Europian, duke përmendur edhe inspektimin e disa prej tyre së bashku me kryetarin e Bashkisë, z. Flamur Golemi.
Në mbyllje, u nënvizua se projekti synon forcimin e bashkëpunimit institucional përmes arsimit dhe trajnimit, duke ndërtuar ura mes universiteteve, administratës publike dhe partnerëve europianë.
