Deputeti i Gjirokastrës, Flamur Golemi, duke folur në Kuvend për projektligjin mbi shtyrjen e afatit të kalimit të tokave të ish-ndërmarrjeve bujqësore në pronësi të përfituesve, është ndalur në mënyrë të veçantë te ajo që ka ndodhur në zonën e Lunxhërisë, që sipas tij është një problem të cilin e njohin të gjithë në Gjirokastër. Golemi është shprehur për përvetësim të tokave në këtë zonë nga individë të pushtetshëm, të cilët më pas i kanë përdorur për të marrë para nga skemat e subvencioneve. Ndonëse është hera e dytë që Golemi e shtron në Kuvend këtë çështje, ai nuk ka përmendur emra konkretë se kush janë këta persona dhe ku e gjejnë mbështetjen politike. Më poshtë pjesa e fjalës në Kuvend ku përmendet kjo çështje.
“Shumë hektarë tokë në këtë zonë janë përvetësuar mbi bazën e ligjit “Për dhënien me qira të tokës bujqësore e pyjore, të livadheve e kullotave, që janë pasuri shtetërore”. Por aty nuk ka ndodhur asnjë investim, nuk është zbatuar asnjë plan biznesi që së paku do të punësonte edhe banorët e fshatrave përreth. Thjesht përvetësuesit e këtyre tokave kanë përfituar para nga skemat e subvencioneve qeveritare, duke lënë djerrë qindra hektarë sipërfaqe. Të humburit e mëdhenj janë patjetër fshatarët, të cilët ndonëse banojnë aty prej vitesh marrin me qira toka nga ata të cilët i kanë përvetësuar në mënyrë klienteliste përmes ligjit që përmenda më sipër. Shembull është fshati Topullaraj, pak kilometra larg qendrës së Gjirokastrës. Ndonëse banorët kanë mbi 20 vjet që jetojnë në këtë fshat të ri nuk kanë përfituar nga tokat e ish- ndërmarrjeve bujqësore, por detyrohen t’i marrin me qira.
©ArgjiroLajm.net
