Këngëtarja e njohur shqiptare, Ledina Çelo, ka njoftuar largimin e saj nga juria e spektaklit televiziv “Albania’s Got Talent”, vetëm pak javë pas fillimit të sezonit të ri.
Lajmin e ka bërë të ditur vetë artistja përmes një postimi në rrjetin social Instagram, ku ka theksuar se vendimi i saj lidhet me arsye personale.
“Me keqardhje, për arsye personale jam tërhequr nga juria e ‘Albania’s Got Talent’,” shkroi Çelo, duke shtuar: “Ruaj kujtimet më të bukura me publikun, stafin dhe kolegët e mi.”
Ky njoftim ka marrë dhjetëra komente dhe reagime nga ndjekësit dhe fansat e saj, të cilët i kanë shprehur mbështetje dhe falënderime për energjinë dhe pozitivitetin që ka sjellë në spektakël.
Ledina Çelo ishte pjesë e jurisë që nga fillimi i këtij sezoni, përkrah Adelina Ismailit, Agron Llakajt dhe Kastro Zizos. Ajo u vlerësua për profesionalizmin dhe komentet e balancuara ndaj konkurrentëve, duke sjellë një frymë të qetë dhe elegante në panelin e jurisë.
Ndërkohë, produksioni i “Albania’s Got Talent” ende nuk ka bërë të ditur nëse vendi i saj do të zëvendësohet nga një tjetër anëtar apo nëse juria do të vijojë me tre pjesëtarë.
Vendimi i papritur i këngëtares ka ngjallur diskutime në rrjetet sociale, ndërsa fansat e saj shpresojnë që kjo të jetë vetëm një pauzë e përkohshme nga angazhimet televizive.
