Këshilli i Bashkisë Gjirokastër miratoi në mbledhjen e zhvilluar sot Paketën Fiskale të vitit 2018. Përmes një njoftimi, Bashkia Gjirokastër sqaron cfarë përmban kjo paketë dhe cilat janë taksat që do të paguajnë qytetarët.
“Sikurse edhe gjatë dy viteve të kaluara, Bashkia Gjirokastër vazhdon të mbetet mbështetje për biznesin dhe për këtë arsye, taksimi i drejtë, tarifimi i mbështetur në kosto si dhe klasifikimi i biznesit, qarkullimit vjetor, lloji i aktivitetit, përbëjnë shtyllat kryesore të kësaj pakete. Nisur nga këta elementë, ndryshimet në tarifimin e bizneseve janë të paprëfillshme”, thuhet në njoftimin e Bashkisë Gjirokastër.
Në total numri i familjeve që parashikohet të përfshihen në skemën e detyrimeve fiskale të Bashkisë Gjirokastër është 8,596 familje. Në planin e të ardhurave janë parashikuar lehtësi fiskale për familjet me probleme sociale, si për invalidët, të verbër, paaftësi, paraplegjikë etj, të cilët përbëjnë rreth 1,026 familje.
Taksat dhe tarifat për abonentët familjarë, të cilët janë invalidë të kategorisë së II-të, të verbër, paaftësi dhe paraplegjikë, te të dy kryefamiljarët (bashkëshorti/bashkëshortja) do të zerohen. Më konkretisht: Taksa e ndërtesës – për këto kategori taksa e ndërtesës do të ulet në masën 100%, nga 100 lekë/muaj do të shkojë në 0 lekë/muaj; Tarifa e pastrimit – nga 150 lekë/muaj do të shkojë në 0 lekë/muaj; Tarifa e ndriçimit – nga 150 lekë/muaj do të shkojë në 0 lekë/muaj; Tarifa e gjelbërimit – për individët invalidë do të shkojë në vlerën 0 lekë/muaj; Tarifa e infrastukturës për arsim, sport, kulturë – do të shkojë në vlerën 0 lekë/muaj
Gjithashtu parashikohen lehtësi fiskale për: personat të cilët gjatë vitit kalendarik klasifikohen në listën e personave me të ardhura nën nivelin minimal jetik, sipas kritereve të përcaktuara në nivelin kombëtar; Për personat me aftësi të kufizuara, invalidë, tetraplegjikë dhe paraplegjikë, të verbrit kur njëri nga kryefamiljarët (bashkëshorti/bashkëshortja) dhe nuk kanë persona të tjerë madhorë në familje, me përjashtim të bashkëshortit/bashkëshortes. Gjithashtu këto familje nuk do të paguajnë tarifat për shërbimet që ofron Bashkia si psh: vërtetimet, librezë ndihme ekonomike, lëshim dokumenti nga arkivi.
Edhe për një taksë tjetër të rëndësishme, siç është taksa e ndërtesës, Bashkia Gjirokastër propozon në këtë paketë fiskale taksim në bazë të vërtetimit hipotekor të sjellë nga familjet me qëllim shpërndarjen e drejtë të barrës fiskale për familjet si dhe llogaritjen e kësaj takse në baze të m2 që disponojnë realisht; më konkretisht: Ndërtesa banimi (100 m) pa vertetim hipotekor do të jete 12 lekë/m2/vit; Ndërtesa banimi para 1993 (në bazë të vërtetimit hipotekor të paraqitur nga qytetari) do të jetë 10 lekë/m2/vit; Ndërtesa banimi pas 1993 (në bazë të vertetimit hipotekor të paraqitur nga qytetari) do të jetë 12 leke/m2/vit.
