Një hulumtim i gjerë në internet ka nxjerrë në pah vendet ku pasagjerët përballen me më shumë raste mashtrimi dhe sjellje abuzuese nga drejtuesit e taksive.
Gjetjet vijnë nga kompania e sigurimeve AllClear, e cila analizoi mbi 450 postime dhe gjithsej 30,000 komente përdoruesish në Reddit, duke zbuluar zonat më problematike në botë në lidhje me sjelljen e shoferëve të taksive.
Sipas rezultateve, rreth një e treta e shoferëve të përmendur në këto diskutime përdorin praktika të paudhshme për të nxjerrë më shumë para nga pasagjerët.
Turqia u rendit në krye të kësaj renditje, me më shumë se 4,000 komente që i referohen incidenteve të mashtrimeve ose sjelljeve të gënjeshtra. Pas saj, në vend të dytë renditet India, me 2,301 komente të ngjashme, ndërsa e treta është Tajlanda, me 2,169 raportime.
Lista vazhdon me Egjiptin (1,715), Australinë (1,598), Meksikën (1,367), Marokun (1,329), SHBA (1,283), Kanadanë (995), Francën (957), Kolumbinë (924), Filipinet (840), Italinë (832) dhe Norvegjinë (799).
Në lidhje me praktikat më të zakonshme të mashtrimit, hulumtimi nxori si më të shpeshta mos përdorimin e taksimetrave ose justifikimin që ky i fundit është “prishur”.
Ekspertët këshillojnë pasagjerët që të mos hipin kurrë në një taksi pa taksometër funksional dhe, në rast se ndodhen në një vend ku kjo mundësi nuk ekziston, të bien dakord paraprakisht për çmimin e udhëtimit.
Një tjetër praktikë e zakonshme është ushtrimi i presionit mbi pasagjerët, ku shoferi i taksisë e detyron klientin të hipë shpejt, “për shkak të trafikut”, ose fillon të ngarkojë bagazhet në bagazh për të shmangur diskutimet mbi çmimin e udhëtimit. Ekspertët nënvizojnë që udhëtarët nuk duhet të bien pre e këtyre presioneve, sidomos në vende të frekuentuara si aeroportet, ku këto praktika janë edhe më të shpeshta.
Po ashtu, shpesh haset justifikimi për “POS-in e prishur”, që detyron pasagjerët të paguajnë vetëm në cash. Në shumë raste, kjo bëhet qëllimisht, pasi bëhet pagesa, shoferët thonë se nuk kanë këmbim dhe mbajnë të gjithë shumën.
Gjithashtu, mosdhënia e faturës mbetet një praktikë e zakonshme në shumë prej vendeve të listuara. Një nga format më të zakonshme të mashtrimit që u regjistrua në të gjitha shtetet është zgjedhja e qëllimshme e një rruge më të gjatë.
Shoferët shpesh llogarisin që pasagjeri nuk e njeh gjeografinë e zonës dhe bëjnë shkurtime ose shmangin kalimin nëpër taksa rrugore për të zgjeruar kohëzgjatjen e udhëtimit dhe, si pasojë, rriten kostot.
Për këtë arsye, hulumtimi këshillon që udhëtarët të kenë aktivizuar telefonin e tyre dhe të kontrollojnë në kohë reale, përmes një aplikacioni harta, nëse rruga që po ndjek shoferi është më e mira.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
