Kryetari i Lëvizjes Vetëvendosje Albin Kurti, ka dalë në një konferencë për mediat sot më 28 dhjetor, pas fitores së VV-së me afër 50 përqind të votave.
Kurti tha se sot ka triumfuar populli i Kosovës. Ai shtoi se institucionet duhet të ngrihen menjëherë, duke nënvizuar se duhet ecur përpara pa vonesa.
“Kjo ishte një fitore madhështore. Më 9 shkurt, fitoi Lëvizja Vetëvendosje dhe partnerët. Sot fitoi populli i Kosovës. Duhet të ecim përpara pa vonesë. Duhet të krijojmë sa më shpejt institucionet dhe të vazhdojmë me punën e mirë dhe të nevojshme. Ne na pret Plani i Rritjes së BE-së. Na presin mbi 1 miliard euro. Ftoj opozitën për marrëveshje për interesin publik, si marrëveshjet ndërkombëtare. Urime për qytetarët, mërgatën dhe të secilit pa dallim”, tha Kurti.
Kurti u pyet edhe për raportet e Lëvizjes Vetëvendosje me Tiranën, duke thënë se bashkëpunimi me Shqipërinë ka qenë gjithmonë i shkëlqyer dhe do të jetë i tillë.
Lëvizja Vetëvendosje ka siguruar 49,79% të votave në zgjedhjet e parakohshme të Kosovës, të zhvilluara këtë të diel.
Rezultati paraprak i publikuar nga Komisioni Qendror i Zgjedhjeve e nxjerr partinë e Albin Kurtit forcë të parë, ndjekur nga PDK 21,19%, LDK me 13,77% dhe AAK me 5,74%.
