4 ndeshje radhazi 0 minuta, shifra këto që tregojnë qartë se Asllani nuk bën më pjesë në planet e Torinos. Së fundmi reagoi publikisht edhe Drejtori Sportiv i klubit “Granada” duke vërtetuar pikërisht këtë: “Asllani është në dalje, me stafin që po punon prej kohësh për t’i vendosur në dispozicion trajnerit Baroni një mesfushor të ri”.
Këtë periudhë, emri i Asllanit po lakohet thuajse në çdo klub të Serie A, praktikisht siç ka ndodhur në çdo sesion të merkatos, por këtë herë situata është ndryshe pasi Asllani rrezikon të “ngroh stolin” për pjesën e mbetur të sezonit, nëse vijon të refuzojë çdo ofertë, siç ka bërë deri më tani.
Pas Fiorentinës, Parmës dhe Sassuolo-s, sipas Sky Sport, në skenë për të siguruar shërbimet e Asllanit ka dalë edhe ekipi i Genoa-s. Daniele De Rossi kërkon një mesfushor të ri në këtë merkato, një lojtar që të luajë topin përpara mbrojtjes, dhe mesfushori kuqezi i plotëson të gjithë këto kritere. Të përfshirë totalisht në këto negociata janë edhe drejtuesit e Inter, me këta të fundit që po përpiqet të gjejnë një sistemim të ri për Asllanin pasi nuk dëshirojnë që kartoni i tij të vijojë të zhvlerësohet në tregun e transferimeve.
