Elbasani po kalon një periudhë jo të qetë, ku vëmendja nuk është përqendruar vetëm te fusha e lojës, por edhe te faktorë të tjerë që kanë ndikuar drejtpërdrejt në ecurinë e skuadrës. Verdheblutë janë përballur me polemika të vazhdueshme në lidhje me arbitrimin, ndërsa paralelisht drejtuesit po punojnë në heshtje për të përforcuar ekipin gjatë merkatos dimërore.
Nga njëra anë, vendimet e gjyqtarëve kanë qenë shpesh në qendër të diskutimeve, duke krijuar pakënaqësi dhe tension në kampin elbasanas. Nga ana tjetër, klubi ka zgjedhur të mos shpërqendrohet nga objektivat sportivë, duke u fokusuar te ndërtimi i një skuadre më konkurruese për vazhdimësinë e sezonit.
ARBITRIMI – Elbasani nuk ka pasur marrëdhënie të mira me arbitrimin gjatë këtij sezoni, teksa në disa ndeshje verdheblutë janë ndier të dëmtuar nga vendimet e gjyqtarëve. Në klub ka pasur shpesh pakënaqësi për mënyrën se si janë interpretuar disa episode vendimtare, të cilat, sipas tyre, kanë ndikuar drejtpërdrejt në rezultatin e ndeshjeve. Rasti më i fundit që ka sjellë reagime ishte sfida ndaj Egnatias, e cila u mbyll në barazim.
Në atë takim u akorduan dy penallti, vendime që u shoqëruan me kontestime të forta nga kampi elbasanas. Sipas tyre, episodet ishin të diskutueshme dhe lanë vend për polemika, duke shtuar edhe më shumë tensionin mes klubit dhe arbitrave. Megjithatë, pavarësisht pakënaqësive të akumuluara, gazeta mëson se në Elbasan nuk kanë ndërmend të vazhdojnë më me nota proteste pranë FSHF-së. Qasja tashmë është më e qetë, me shpresën që episodet e diskutueshme të mos përsëriten dhe që gjykimi të jetë sa më korrekt në vazhdim.
SITUATA ME MERKATON – Elbasani dhe Gvozdenoviç janë në pritje të afrimeve të para në këtë merkato dimërore, teksa zyrtarisht klubi ende nuk ka bërë asnjë lëvizje. Megjithatë, praktikisht puna është kryer në prapaskenë dhe dy marrëveshje mund të konsiderohen të mbyllura, edhe pse ende jo të formalizuara. Bëhet fjalë për mesfushorin senegalez Insa Boye, 23 vjeç, i cili pritet të jetë afrimi i parë konkret. Burime pranë “Panorama Sport” bëjnë me dije se lojtari do të mbërrijë në Shqipëri më 22 janar dhe menjëherë pas kësaj do të vihet nën urdhrat e trajnerit Gvozdenoviç.
Klubi e konsideron këtë transferim si të përfunduar dhe tashmë mbetet vetëm aspekti formal për ta zyrtarizuar. Situatë më e ndërlikuar paraqitet për afrimin e dytë. Samuel Nongoh, 21-vjeçari nga Kameruni që luan si sulmues krahu, ende nuk ka zgjidhur problemet burokratike me vizën. Nga karakteristikat e tij teknike, ai shihet si një “sozi” i Diallos dhe vlerësohet shumë nga stafi teknik, por për momentin gjithçka varet nga pajisja me dokumentacionin e nevojshëm. Në klub shpresojnë që kjo çështje të zgjidhet sa më shpejt, në mënyrë që edhe Nongoh të bashkohet me ekipin. Nëse këto dy afrime konkretizohen sipas planit, me shumë gjasa merkatoja e Elbasanit do të konsiderohet e mbyllur. Drejtuesit nuk parashikojnë lëvizje të tjera, përveç rastit kur në horizont shfaqet ndonjë futbollist i lirë, një mundësi që nuk mund të refuzohet dhe që do të ndryshonte planet aktuale të klubit.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
