Ndërprerjet e ndeshjeve të sotme si në Kategorinë Superiore, ashtu edhe në Kategorinë e Parë, kanë bërë që FSHF të shohë me prioritet kushtet atmosferike në një fundjavë ku thuajse të gjitha terrenet sportive janë rënduar nga reshjet e shumta të shiut. Ndaj po monitorohet me kujdes situata edhe në qytetet e tjera për ndeshjet që luhen nesër dhe pritet një vendim zyrtar, pasi shumë sfida të Kategorisë së Dytë dhe moshave mund të mos luhen për shkak të kësaj situate.
Një ndeshje e cila nuk rrezikon për momentin të shtyhet është ajo e Kategorisë Superiore mes Luftëtarit dhe Partizanit në Gjirokastër, pasi vendasit i përshkruajnë kushtet në stadiumin e tyre si “optimale” për zhvillimin e ndeshjes sipas kalendarit të përcaktuar nga FSHF.
“Për momentin nuk kemi asnjë situatë të ngjashme me atë që u pa sot në fusha të tjera, edhe pse ka pasur reshje. Mund të themi se aktualisht kushtet e stadiumit janë optimale për zhvillimin e ndeshjes ndaj Partizanit. Nuk mund të bëjmë parashikime për reshjet e shiut që mund të bijnë nesër, por në kushtet aktuale situata lejon zhvillimin normal të ndeshjes ndaj Partizanit”, u shpreh për “VIP Sport” zëdhënësi për shtyp i Luftëtarit, Rigels Malile.
