Te Bylisi oreksi është rritur, sidomos pas fitores që realizuan me kryesuesit e Vllaznisë në Ballsh, në fundjavën e shkuar, por edhe nisur nga forma e mirë që ka shfaqur skuadra në ndeshjet e fundit.
Mallakastriotët janë duke i dhënë dorën e fundit përgatitjeve për transfertën e radhës, të cilën e luajnë të shtunën në “Elbasan Arena” me vendasit verdheblu. Një duel sa i vështirë, por aq edhe me interesa për të dyja ekipet që kanë objektiva të ndryshme.
Ballshiotët dhe trajneri Josa shpresojnë shumë që të shkojnë me staf të plotë, në mënyrë që të hedhin në fushën e lojës më të mirët. Nga ana tjetër, në ndeshjen e kontrollit që është zhvilluar brenda grupit bie në sy një ritëm tjetër, por edhe dëshirë në radhët e lojtarëve. Trajneri Mirel Josa u dha mundësi edhe atyre lojtarëve që të tregojnë veten, të cilët nuk luajtën ndaj Vllaznisë dhe u aktivizuan me ekipin B, për të ruajtur apo edhe për të kapur formën optimale.
Bylisi duket se synon që ta mbyllë në mënyrën më të mirë të mundshme këtë fazë të tretë, ndaj edhe është deklaruar se tashmë edhe në Elbasan synon më të mirën. Stafi kërkon që lojtarët të ruajnë ritmin, sepse në javën e fundit presin një rival si Vora, në fushën e tyre, një tjetër ndeshje shumë e rëndësishme. Por, së pari kanë kërkuar nga skuadra vigjilencë për transfertën me verdheblutë, aty ku Bylisi shkon për të dhënë gjithçka. Ballshiotët kanë treguar këtë sezon se nuk janë një ekip fushe.
Ndaj edhe kërkojnë surprizën me verdheblutë, ku do të bëjnë ç’është e mundur që të mos dalin pa pikë, për të qëndruar sa më larg “zonës së ftohtë” të tabelës së klasifikimit. Dy ndeshjet e fundit të kësaj faze janë sa vendimtare, aq edhe delikate. Ndaj edhe në Ballsh tashmë përgatiten që të marrin pikët maksimale dhe të hedhin hapa të rëndësishëm drejt mbijetesës në elitë.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
