Eliminimi nga Kupa karikon Partizanin, lojtarët gati për “luftë”

Partizani vijon përgatitjet para ndeshjes derbi të së hënës ndaj Dinamos, një sfidë kjo shumë e rëndësishme për pjesëmarrjen në “Final Four”. Ajo disfatë ndaj Elbasanit në çerekfinalet e Kupës së Shqipërisë ka lënë një shije të hidhur në radhët e të kuqve, sidomos për mënyrën se si erdhi.

Megjithatë, në radhët e lojtarëve të skuadrës së kryeqytetasve nuk ka kohë për t’u demoralizuar, teksa grupi ka marrë një shtysë më tepër dhe atë eliminim ndaj Elbasanit do ta kthejë në një motivim ekstra që ndaj dinamovitëve të marrë maksimumin dhe të dalë me pikë të plota nga stadiumi “Air Albania” për të prekur vendin e katërt.

Sa i takon stërvitjes, lojtarët që ishin pjesë e ndeshjes me Elbasanin nga fillimi në fund kanë marrë një ngarkesë më të lehtë dhe relaksuese, teksa në lidhje me formacionin që do të zbresë në fushë ndaj Dinamos ka disa dilema. Kështu, Redon Ismaili ka një problem në gju, me mesfushorin që nuk mori asnjë minutë në takimin e Kupës për të mos u rrezikuar. Lojtari do të ndiqet me kujdes deri në seancën e fundit stërvitore, atë të së dielës, dhe më pas do të vendoset nëse do të marrë në dorë “frenat” e repartit të mesfushës para mbrojtjes në rolin e numrit gjashtë.

Në të kundërt, Dumbia mund ta nisë sërish si titullar, me lojtarin 21-vjeçar nga Bregu i Fildishtë që është kthyer menjëherë i rëndësishëm për Partizanin pas dëmtimit në javën e gjashtë të kampionatit, i cili e mbajti për një kohë të gjatë jashtë fushës. Nga ana tjetër, edhe Kamer Qaka nuk është në maksimum, me lojtarin që po ashtu do të ndiqet me kujdes në stërvitje për të vendosur më pas nëse do të startojë nga minuta e parë ndaj Dinamos apo do ta nisë nga stoli, ashtu siç ndodhi në takimin ndaj Elbasanit.

Në të kundërt, sërish gati do të jetë Valentino Murataj, i cili edhe pse u afrua në merkaton e janarit është bërë menjëherë i rëndësishëm për Partizanin duke qenë pjesë e formacionit në ndeshjet e fundit, ndërsa ka bërë shumë mirë në fushë. E rëndësishme për “Demat e Kuq” është që atmosfera në skuadër vijon të jetë pozitive pavarësisht eliminimit në Kupë dhe se ajo disfatë nuk ka lënë shenjë në aspektin psikologjik të futbollistëve, teksa në ambientin e kryeqytetasve janë besimplotë se do t’ia dalin me sukses në derbin e kryeqytetit ndaj Dinamos të hënën.

© BalkanWeb