Tashmë është zyrtare: Çmimet e Mëdha të Bahreinit dhe Arabia Saudite, të planifikuara për muajin prill, janë anuluar nga kalendari i Kampionatit Botëror të Formula 1 për shkak të luftës në Iran dhe situatës së tensionuar në Lindjen e Mesme. Këto gara nuk do të zëvendësohen me të tjera. Njoftimi u bë në orët e para të mëngjesit të së dielës në Shanghai, në prag të Çmimit të Madh të Kinës. Formula 1 duhej të garonte në Bahrein më 12 prill dhe në qytetin saudit Jeddah më 19 prill.
“Edhe pse ishte një vendim i vështirë për t’u marrë, për fat të keq është vendimi i duhur në këtë moment, duke marrë parasysh situatën aktuale në Lindjen e Mesme,” – deklaroi Stefano Domenicali, president dhe CEO i Formula 1. “Dua të shfrytëzoj këtë rast për të falënderuar FIA dhe promotorët tanë të jashtëzakonshëm për mbështetjen dhe mirëkuptimin e plotë, pasi ata mezi prisnin të na mirëprisnin me energjinë dhe pasionin e tyre të zakonshëm. Shpresojmë të rikthehemi atje sapo rrethanat ta lejojnë.”
Nga ana tjetër, presidenti i FIA, Mohammed Ben Sulayem, theksoi se: “FIA do të vendosë gjithmonë në radhë të parë sigurinë dhe mirëqenien e komunitetit tonë dhe kolegëve tanë. Pas një vlerësimi të kujdesshëm kemi marrë këtë vendim me përgjegjësi të plotë. Shpresojmë për qetësi, siguri dhe një rikthim sa më të shpejtë të stabilitetit në rajon. Mendimet e mia janë me të gjithë ata që janë prekur nga ngjarjet e fundit.”
