Aktori i njohur Elvis Pupa është bërë pjesë e edicionit të tretë të spektaklit “Ferma VIP”, duke sjellë një hyrje që nuk kaloi pa u vënë re.
I njohur si një nga figurat që ka sjellë për herë të parë në Shqipëri zhanrin e “Stand Up Comedy”, Pupa u prezantua për publikun dhe banorët e tjerë përmes një klipi ku ndau disa detaje personale dhe të përditshme. Në këtë video prezantuese, ai u shpreh me humor: “Pjata ime e preferuar është pilaf me pak kosë e qepë të njoma”.
Më tej, nga ambientet e një prej serave të fermës, aktori foli edhe për një temë më konkrete, duke prekur çështjen e rritjes së çmimeve. “Mirë do ishte të mbillnin e disa perime sepse çmimet janë rritur shumë kohët e fundit. Kam punuar, me bimët dhe kafshët jam marrë vesh, ishalla merrem dhe me njerëzit dhe kompletohem si person edhe unë”, u shpreh ai.
Ndër të tjera, pak para se të hynte në shtëpi ai u shpreh: U mërzita, gjithë këtë serë e keni mbjellë me speca. Ta kisha këtë në Australi kisha bërë namin. Kur dolën lajmet më shkruanin çunat “ore ça përdor që të ec kaq shumë”, dhe thashë të hyj këtu brenda dhe t’ua tregojë. Sa do të qëndrojmë këtu ne? 100 ditë, 3 muaj, fiks fare!
Hyrja e tij në spektakël u shoqërua me muzikë tallava, duke i dhënë momentit një atmosferë festive dhe energjike. Nën këto tinguj, Elvis Pupa u bashkua me fermerët e tjerë, duke nisur kështu zyrtarisht rrugëtimin e tij në këtë format.
https://youtu.be/Pi1YQnLyNNs?si=a1Iu1rE8yUbeNFUG
Pjesëmarrja e tij pritet të sjellë jo vetëm momente argëtuese për publikun, por edhe dinamika të reja brenda fermës, duke qenë se ai njihet për natyrën e tij spontane dhe sensin e humorit.
