Këngëtari i njohur shqiptar, Besnik Qaka, është rikthyer në vëmendje me një intervistë të fundit në Klan Kosova, ku ka folur hapur për jetën personale, karrierën muzikore dhe raportin e tij me formatet televizive.
Gjatë bisedës, artisti është ndalur edhe te një nga formatet më të komentuara të momentit, “Big Brother”, për të cilin emri i tij është përfolur shpesh si një nga kandidatët potencialë. Qaka ka pranuar se ka pasur interes dhe madje edhe ftesa konkrete për t’u bërë pjesë e këtij reality show, por ka lënë të kuptohet se nuk e sheh veten në një eksperiencë të tillë, të paktën për momentin.
“Unë edhe Big Brother jemi shumë larg. Ftesa kam pasur. Edhe kështu në rrjete sociale e kam parë emrin tim, gjithmonë kam thënë me kë kanë folur këta njerëz”, u shpreh ai, duke nënvizuar se shpesh është surprizuar nga spekulimet që qarkullojnë online.
Ai shtoi gjithashtu se është kontaktuar edhe nga njerëz të afërt apo ndjekës që e kanë pyetur drejtpërdrejt për një pjesëmarrje të mundshme. “Më kanë thirr njerëzit a ke me hy, ia kam bërë mos e bë të madhe”, tha këngëtari.
Megjithëse nuk dha një përgjigje përfundimtare nëse do ta konsideronte ndonjëherë një eksperiencë të tillë, deklaratat e tij lënë të kuptohet se muzika mbetet prioriteti kryesor në këtë fazë të karrierës.
Mbetet për t’u parë nëse në të ardhmen Besnik Qaka do të surprizojë publikun duke u bërë pjesë e “Big Brother VIP Kosova” apo “Big Brother VIP Albania”.
