Aktorja Jennie Garth ka rrëfyer një nga periudhat më të errëta të jetës së saj, më shumë se një dekadë pas ndarjes nga ish-bashkëshorti Peter Facinelli. Ylli i serialit “Beverly Hills, 90210” ndalet në këtë kapitull të vështirë në librin e saj më të ri, “I Choose Me: Chasing Joy, Finding Purpose, and Embracing Reinvention”, i cili pritet të publikohet më 14 prill.
Në kujtimet e saj, Garth tregon se pas ndarjes kishte rënë në një gjendje të rënduar emocionale, duke u përpjekur të përballonte dhimbjen përmes alkoolit dhe tabletave. Situata arriti në një pikë kritike, kur një natë iu desh ndërhyrje mjekësore me lavazh stomaku. Më pas, aktorja kaloi një periudhë rehabilitimi në qendrën Canyon Ranch, duke nisur një proces të gjatë rikuperimi.
Në një intervistë për revistën People, të publikuar më 8 prill, 54-vjeçarja u shpreh se në atë periudhë nuk reflektonte aspak energji pozitive. “E shihja në pasqyrë ndikimin e dhimbjes dhe zemërimit”, rrëfeu ajo, duke shtuar se gjithçka ndryshoi kur vendosi të hiqte dorë nga barra emocionale dhe të falte.
Sot, Garth tregon se marrëdhënia me Facinellin është stabilizuar, veçanërisht në aspektin e bashkë-prindërimit të tre vajzave të tyre. Ajo thekson se ka mësuar të vendosë veten në plan të parë, një mesazh që lidhet edhe me personazhin e saj Kelly Taylor, i cili dikur deklaronte: “Zgjedh veten”.
Pas një rrugëtimi të gjatë, aktorja thotë se më në fund ka arritur në një fazë të jetës ku ndihet e qetë me zgjedhjet e saj dhe e gatshme të jetojë me më shumë vetëdije dhe paqe të brendshme.
