Legjenda braziliane e futbollit, Romário, i ka dhënë fund marrëdhënies me të dashurën e tij, Tiffany Barcelos, mes akuzave për tradhti që kanë bërë bujë në mediat rozë.
Sipas raportimeve, 60-vjeçari ishte në një lidhje me studenten e stomatologjisë, Tiffany, e cila është 35 vite më e re se ish-ylli i futbollit. Romanca e tyre, megjithëse e shkurtër – rreth tre muaj – kishte marrë vëmendje të madhe publike për shkak të diferencës në moshë dhe stilit të jetesës luksoze që shfaqnin në rrjetet sociale.
Por marrëdhënia duket se ka marrë një kthesë të papritur. Mediat braziliane raportojnë se Romário dyshohet se e ka tradhtuar partneren me Barbara Cavalcanti, një mikeshë e afërt e Tiffany-t. Zbulimi i kësaj situate ka çuar menjëherë në ndarjen e çiftit.
Situata u përkeqësua edhe më shumë pasi ish-futbollisti u pa në Fernando de Noronha, një nga destinacionet më të njohura turistike në Brazil, në shoqërinë e Barbarës. Të dy u fotografuan së bashku me një grup miqsh, duke shtuar dyshimet për një lidhje të mundshme mes tyre.
Gjatë kohës së lidhjes, Romário dhe Tiffany kishin udhëtuar në disa destinacione të njohura, përfshirë edhe Buenos Aires, duke ndarë momente nga jeta e tyre në publik.
Deri më tani, asnjë prej palëve nuk ka reaguar zyrtarisht për situatën, ndërsa historia vazhdon të jetë në qendër të vëmendjes së mediave rozë.
