Timothée Chalamet ka bërë daljen e tij të parë të madhe publike pas ceremonisë së Oscars 2026, duke u shfaqur në CinemaCon në Las Vegas së bashku me Zendaya dhe Jason Momoa, për të prezantuar filmin e shumëpritur “Dune: Part Three”.
Aktori 30-vjeçar, Zendaya 29 vjeçe dhe Momoa 46 vjeç dolën në skenë krah regjisorit Denis Villeneuve, ku prezantuan pamje ekskluzive nga filmi, përfshirë një sekuencë të madhe beteje që duket se hap historinë e re. Publiku pati gjithashtu mundësinë të shohë momente të reja nga vazhdimi i sagës sci-fi.
Chalamet u shpreh emocional gjatë eventit, duke theksuar se përfundimi i trilogjisë së “Dune” është një nga përvojat më të rëndësishme të karrierës së tij. Ai tha se ka qenë një rrugëtim i veçantë të punojë për tre filma me Villeneuve dhe Zendaya, duke e krahasuar ndikimin e projektit me filmat e mëdhenj si “Lord of the Rings”, në një kohë kur industria e kinemasë po përballet me sfida.
Filmi i ri është i bazuar në romanin “Dune Messiah” të Frank Herbert dhe vijon historinë e Paul Atreides, i cili tashmë përballet me pasojat e vendimeve të tij, 17 vite pasi është bërë perandor i universit të njohur. Sipas Chalamet, personazhi i tij shfaqet më i errët dhe më kompleks në këtë kapitull të fundit.
Në kastin e ri bashkohen edhe emra të njohur si Robert Pattinson dhe Anya Taylor-Joy, ndërsa Jason Momoa rikthehet në ekskluzivitet. “Dune: Part Three” pritet të dalë në kinema më 18 dhjetor 2026.
