Kryesuan në 31 nga 33 javë në total, mjaftonte të mos humbisnin në Korçë, në shtëpinë e tyre, në javën e fundit, por Laçi vuri në jetë një kryevepër të vërtetë, i shënoi një gol Skënderbeut në minutën e 96-të duke i rrëmbyer nga duart trofeun. Pas vetëm një viti, ekipi kurbinas rikthehet në elitë, këtë e bënë me spektakël dhe trofe. Në këtë periudhë, ku në Shqipëri është e vështirë të flas për futboll të pastër, futboll pa llogari në tavolinë, kjo ishte një nga ata pak ndeshje të vërteta, një ndeshje që Laçi e fitoi me meritë edhe pse për më shumë se 20 minuta luajtën me një lojtar më pak.
Me 79 pikë në 33 javë, Laçi e mbylli në vendin e parë, plus 2 pikë në raport me Skënderbeun. Në shifra, Laçi nuk “vodhi” asgjë, pasi janë ekipi që ka pësuar më pak humbje, vetë 2 të tilla, janë gjithashtu ekipi që ka pësuar më pak gola 23. Një meritë të pa diskutuar në këtë ka portieri Ortielo Biba, një nga zbulimet e këtij sezoni, një talent i ditëlindjes 2004, gjithashtu edhe pjesa tjetër e prapavijës.
Jo vetëm mbrojtja, Laçi kishte këtë sezon sulmin e dytë më të mirë, me 60 gola të shënuar, me golavarazhin më të mirë në total, plus 37-të. Lojtarë si Myrta, me 17 gola, Tresa, apo kapiteni Kurti, bënë diferencën këtë sezon, një grup fantastik lojtarësh, me një moshë mesatare prej 21-22 vjeç, që premton shumë edhe për sezonin e ri në elitë.
Në Korçë, i gjithë ambienti, tifozë dhe staf drejtues, nuk e pritën mirë këtë humbje duke vendosur tani në dyshim të fortë projektin për sezonin e ri.
