Valverde në spital, por mohon goditjen nga Tchouameni, Reali në kaos total

Në Madrid është kaos total, një situatë e paprecedentë që sheh si protagonistë dy lojtarë, Federico Valverde dhe Aurelien Tchouameni. Dy lojtarët nuk janë mjaftuar vetëm me përplasjen verbale në seancën stërvitore, por sipas mediave në Spanjë, të dy janë përplasur sërish, këtë herë në një sherr të dhunshëm që përfundoi me shtrimin e Valverdes në spital për shkak të një traume të rendë në kokë. Valverde u gjet nga stafi i shtrirë në tokë, i gjakosur, pa ndenja, madje nuk ishte i aftë as të kujtonte.

Përballë një situatë të tillë, kaq të rëndë, as klubi i Real Madrid nuk mund të qëndronte në heshtje, por u detyruan të dilnin me një reagim zyrtar duke konfirmuar fillimisht se për të dy lojtarët ka nisur një proces disiplinor. Ndërkohë, në lidhje me gjendjen e lojtarit, në reagimin për mediat, Reali sqaroi se Valverde është i detyruar të qëndrojë pushim 10-14 ditë si pasojë e traumës së pësuar. Në këtë mënyrë, Valverde humbet “El Clasico” përballë Barcelonës, me shumë gjasa edhe Tchouameni.

Ndryshe nga mediat, Valverde kishte një tjetër version, ku në reagimin e tij në rrjetet sociale mohoi në mënyrë kategorike se është përplasur fizikisht me Tchouamenin:

“Kisha një incident me një shok të skuadrës gjatë seancës stërvitore , kjo si pasojë e lodhjes dhe një sezon jo pozitiv, pa trofe. Në një dhomë zhveshje këto janë gjëra normale, por që zgjidhen aty pa u bërë mediatike. Më pas kishim një tjetër sqarim, ku gjatë debatit godita kokën në tavolinë dhe pësova një çarje, për të cilin u desh të shkoja në spital për një kontroll. Në asnjë moment, në asnjë rrethanë nuk më ka goditur askush. Më vjen shumë keq për këtë situatë. Jam në dispozicion të ekipit dhe klubit për të bashkëpunuar për çfarë do vendimi që klubi do të marrë”, u shpreh ndër të tjera Valverde.

Ndërkohë, në radhët e Realit, drejtuesit e klubit kanë nisur një hetim për të kuptuar se kush nxjerr informacionet për mediat pasi dyshojnë se mes tyre ka një tradhtar.

© BalkanWeb