Çiklistët kanë mbërritur në Bullgari dhe sot nis më në fund Xhiroja e Italisë 2026. Këtë vit ekziston një favorit i qartë, jo vetëm sepse në palmaresin e tij numëron tashmë dy fitore në Turin e Francës dhe një në Vueltën e Spanjës, por edhe sepse në vitet e fundit ka qenë pothuajse i vetmi që, herë pas here, ka arritur ta mbajë nën kontroll Tadej Pogaçarin në ngjitje.
GARA PËR FANELLËN ROZË Jonas Vingegaard do të marrë pjesë për herë të parë në karrierë në “Corsa Rosa” dhe objektivi i tij është që ta godasë menjëherë objektivin madhor. Të çojë “Fanellën Rozë” në Danimarkë do të thotë të kompletojë ciklin e “Grand Tour”-eve, duke paraprirë në këtë arritje edhe vetë sllovenin Pogaçar. Kur është në formën më të mirë në ngjitje, ai është pothuajse i pakapshëm, dhe mes Alpeve e Apenineve do të gjejë terren të bollshëm për të shfaqur potencialin e tij. Së bashku me të, skuadra “Visma | Lease a Bike” do të sjellë një ekip shumë të fortë, me Sepp Kuss, fitues i Vueltës 2023, si dhe Davide Piganzoli e Wilco Kelderman, që do ta mbështesin në etapat malore. Pas tij renditen të paktën dhjetë çiklistë që mund të synojnë podiumin në Romë.
Javët e fundit janë rritur ndjeshëm kuotat e Giulio Pellizzarit (Red Bull-Bora-hansgrohe), fitues i Turit të Alpeve dhe autor i një fillim-sezoni shumë solid. Vitin e kaluar ai përfundoi i pesti pasi nisi garën si gregar i Rogliç, por këtë vit do të jetë vetë lideri i skuadrës, me Jai Hindley, fitues i Xhiros 2022 dhe kandidat potencial edhe për triumfin në 2026-ën, si dhe Aleksandr Vlasov të gatshëm për ta ndihmuar. Janë gjithashtu dy çiklistë që e kanë deklaruar hapur objektivin për podium: Felix Gall (Decathlon CMA CGM), i pesti në Turin e Franës dhe i teti në Vuelta sezonin e kaluar, si dhe Ben O’Connor (Jayco AlUla), i cili këtë vit nuk e nisi shumë fuqishëm sezonin, por e njeh mirë luftën për pozitat e para në një Tur të Madh
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
