Federata shqiptare e futbollit ishte e para që tërhoqi mbështetjen për Infantinon në zgjedhjet e ardhshme të FIFA-s, që do të mbahen në 18 mars të vitit 2027, pas tentativës së tij për të shitur të drejtat e Botërorit.
Presidenti i UEFA-s, Ceferin, hyri në përplasje të ashpër me kreun e FIFA-s dhe Duka, si zëvendëspresident i UEFA-s dhe njeri i besuar i Ceferin, ishte i pari që bëri një lëvizje demonstrative.
Pak javë më pas, të njëjtën gjë bënë edhe Federatat e Italisë dhe Anglisë.
Deri këtu duket si një luftë klanesh, secili sipas interesit të vet. Mirëpo, së fundmi FIFA ka nisur një audit ku përfshihet edhe Federata Shqiptare e Futbollit.
Burime pranë FSHF bëjnë me dije se kontrolli ka të bëjë me biletat që federatat kanë tërhequr gjatë Botërorit.
Çdo federatë ka të drejtë të tërheqë një numër të caktuar biletash për çdo ndeshje. Por duhet të bëjë transparencë me to. Nëse ua dhuron stafit të saj, ajo duhet ta vërtetojë se ata janë zyrtarë ose ikona të futbollit vendës. Nëse i shet, paratë minimalisht duhet të shkojnë në arkat e federatës, të dokumentuara.
Duke qenë se Botërori 2026 pati rekord ndeshjesh, 104 të tilla, edhe numri i biletave që kanë pasur në dispozicion federatat ka qenë i lartë.
Mirëpo, FIFA ka vendosur të kontrollojë kryesisht federatat që nuk i kanë pasur kombëtaret në Botëror. Njësoj si Shqipëria.
Mësohet se disa federata i kanë tërhequr të gjitha biletat që kanë pasur në dispozicion. Dhe çmimi i tyre në total shkonte afro 300 mijë dollarë gjatë gjithë turneut. Në treg të zi, vlera e tyre shkonte 4 ose 5 herë më shtrenjtë.
Një lloj biznesi për të cilin FIFA e ka shumë të qartë si funksionon.
Sepse lind pyetja: pse duhet të tërheqë një federatë shqiptare, kosovare apo ajo greke biletat e një ndeshjeje si Kepi i Gjelbër-Arabia Saudite?
Por jo pa qëllim FIFA tani ka vendosur të bëjë një audit ku në fokus janë “rebelët” si puna e Dukës, që dolën të parët kundër Infantinos kur ai u sulmua në të katër anët.
Ka nga ata që thonë se ky është një plan i menduar mirë. Duke mos dashur të merret me dy federata të fuqishme në Europë si Anglia dhe Italia, të cilat gjithashtu dolën kundër, FIFA bën shembull një vend si Shqipëria, ndërkohë godet edhe Ceferinin, sepse Duka është zëvendës i tij në UEFA.
Por u jep një mesazh edhe atyre që rebelohen se një ditë do të japin llogari.
